Господи Боже наш, пришедый в Кану Галилейскую и тамошний брак благословивый, Сам, Владыко Пресвятый, приими моление нас, рабов Твоих, и подаждь рабом Твоим живот мирен, долгоденствие, целомудрие, друг ко другу любовь в союзе мира, единомыслие душ и телес, семя долгожизненное, о чадех благодать.
Сподоби их видети чада чадов, исполни домы их достатка и всякого благополучия, да имеют необходимое для жизни и могут уделять нуждающимся, даруя им и всем сущим с ними всё полезное ко спасению. В мире и единомыслии сохрани их и сподоби в старости маститей достигнути, чистым сердцем делающих заповеди Твоя.
Призри, Милосердный Господи, и на супругов, скорбящих о неплодстве и чадородия лишенных. Услыши моление их и, якоже древле благословил еси Авраама и Сарру, Иоакима и Анну, Захарию и Елисавет, тако и ныне по великой Твоей милости даруй им плод чрева и благочадие, да возвеселятся они о рождении чад своих и с благодарением прославляют Тебя.
Умножи любовь в семьях наших, сохрани супругов в мире, верности и единомыслии; примири разделенных и враждующих, укрепи родителей в попечении о чадах своих и сохрани домы наши в мире и благочестии.
Яко Ты еси Бог милости, щедрот и человеколюбия, и Тебе славу возсылаем, Отцу и Сыну и Святому Духу, ныне и присно и во веки веков.
Аминь.