#ЫрыаЫллыгынанСулустардыын

"Ырыа ыллыгынан сулустардыын" 10-с үбүлүөйдээх төгүлүн ыытыллыбыт шоу-бырайыакка Үөһээ Бүлүүттэн Саргылана Андреева кыттан ситиһиилэннэ

Саргылана Дьокуускай куоракка ый устата ыытыллыбыт бырайыак араас тэрээһиннэригэр кыттан, онтон түмүктүүр киэһэҕэ А.Е.Кулаковскай аатынан култуура дьиэтин үрдүк сыанатыгар эстрада эдэр сулуһа Кирилл Матвеевтыын дуэттаан, 2-с степеннээх дипломант үрдүк аатын ылла.

Бу сайын ыытыллыбыт кастиҥҥа уопсайа 60 киһи тиийбит. Онтон 23 киһи талыллыбыт. Дьүүллүүр сүбэ оннугар кыайыылаахтары дьоро тэрээһин көрөөччүлэрэ сыаналаабыттар.

Бырайыак ааптара "Арыллыы" ырыа студиятын салайааччыта, СӨ Ыччат политикатын уонна Уопсастыбаннай хамсааһын туйгуна, 30-тан тахса сыл стажтаах ырыа педагога Байаана Дагдай.

Шоу-кэнсиэр режиссера СӨ Култууратын туйгуна Алексей Алексеев, бырайыак кыттааччыларын ырыаҕа тренерэ - мелодист, "Саҥа ырыа-2010" уонна "СулуStar 2021" ырыа күрэхтэрин финалиһа Елена Евсеева.

Саргылана Андреева "Вилюйавтодор" РИК Үөһээ Бүлүүтээҕи филиалыгар суол маастарынан үлэлиир. Икки оҕолоох ийэ иллэҥ кэмигэр буулдьанан ытыынан дьарыктанар. Ырыаны оҕо эрдэҕиттэн аргыс оҥостон, улуус киинигэр ыытыллар тэрээһиннэргэ кыралаан ыллыыр.

Үөһээ Бүлүү аатын доргуччу ааттаппыт Саргылананы бу үбүлүөйдээх бырайыакка ситиһиилээхтик кыттыбытынан, көрөөччүлэртэн үрдүкү сыанабылы ылбытынан итиитик-истиҥник эҕэрдэлиибит!

@uoheebuluu