«Апелемачинь урок»

Эйкакштнень туртов, конатне кадовсть тетянь-авань вановттомо, центрасонть ютавтовсь «Урок мужества». Сонзэ ветизе старшей сержантось, СВО-нь ветеранось Самир Алиев. Вастовоманть анокстамс лездась МР-ва «Защитники Отечества» Госфондонь филиалось.

Самир – те эйдень кудонь выпускник, конань прядызе 2001 иестэ. Тесэ тонавтнемадонть мейле профлицейсэ тензэ максовсь автомобилень витнемань коряс слесарень специальностесь. Срочной службанзо ютызе Хабаровской крайсэ, теде мейле важодсь Северсэ.

Церась эйкакшчистэ пек вечксь ваномо Ине Отечественной войнадо фильмат. Сынь эйсэнзэ кастсть Тиринь масторонтень вечкеманть ды апелемачинть. Мельсэнзэ-превсэнзэ нейгак кирдеви Михаил Девятаев марто вастовомась. Сон эйкакштненень евтнесь ятонь полонсто оргодемадонть.
Зярдо ушодовсь специальной военной операциясь, Самир арсесь, мейсэ вийсэнзэ лездамс Тиринь масторонтень. Призывденть ульнесь бронезэ, ансяк церась эзь карма аштеме ве ено: кадызе Северсэ роботанзо ды сась Саранскоев учомо повестка. Сон тензэ эзь учово, кармась важодеме заводсо. Ялатеке седейсэнть ульнесь талнома – сонензэ улема тосо, косо пек эряви. 2023 иень июньстэ сермадстсь контракт.
Фронтсо Луганской енкссо Алиев топавтсь танконь батальононь автомобильной отделениянь командирэнь тевтнень. Сонзэ батальонсо седе ламо ульнесть Мордовиясто цератне. 2025 иень ноябрясто Кременной ало Алиев стакасто ранязель. Кувать лецямодонть мейле демобилизовизь.

Мужестванть ды апелемачинть кис Самир Алиев казезь «За воинскую доблесть» ды «За храбрость» II степентнень медальтнесэ, истя жо «За смелость и отвагу» Мордовия Республикань отличиянь знаксо.
Эйкакштненень пшкадемстэ ветеранось мерсь: «Яводо мель вейкенк-вейкенк туртов, илядо велявто ломаненть эйстэ, конантень эряви лезкс. Бути эрьвась карми лездамо, сестэ весемесь ули паро. Тонавтнеде вадрясто, кунсолодо тонавтыцятнень, касодо превеекс ды вечкеде тиринь енксонк. Арсян тенк муемс эсь кинть ды зярдояк а потамс удалов».

Фотось «Защитники Отечества» Госфондонть.