Көмүс күһүн буолла да, айылҕаҕа оскуоланан бары Туризмҥа тахсар үгэстээхпит. Бүгүн, балаҕан ыйын 11 күнүгэр күммүт онон- манан былыттаах, күн көрдөҕүнэ сылаас, арыый тыаллаах күн буолан биэрдэ. Бу сырыыга арыый атын, сылдьыбатах сирбитигэр, "Бэс элэмэс" өтөҕөр сырыттыбыт. Сорохтор сатыы, сорохтор билисипиэтинэн бардылар.
Күрэхтэһиилэр 4 этэрээттэринэн ыытылыннылар: Сарыал, Кустук, Дьулуур, Кэскил. Анаммыт сиргэ тиийэн оҕолор күрэхтэһиэх иннинэ эттэрин - сииннэрин уһугуннаран зарядкалаатылар.
Бастакынан "Моһоллору туорааһын" күрэххэ уочаратынан бириэмэҕэ сүүрдүлэр. Манна рюкзактаах сүүрүү, лабиринтан тахсыы, мэһэй сетка аннынан сыыллыы, быанан барыы, мас үрдүнэн хаамыы, рюкзак быраҕыы, финишка сүүрүү буолла. Бастакы миэстэҕэ саамай тулуурдаах, дьулуурдаах, түргэнник моһоллору туораабыт *Дьулуур* этэрээтэ таҕыста
Иккис күрэххэ мас хайытан, оллоон бэлэмнээн, уот оттуу, уу оргутуу. Бастакынан *Сарыал* этэрээтин уута оргуйан, бастаатылар.
Эбиэт кэмигэр бары түмсэн олорон, минньигэс ыһыктарын аһаатылар, сынньанан ыллылар.
Салгыы станцияларынан күрэх буолла. Биирдии станцияҕа анаммыт учууталлар сорудах толкуйдаабыттарын оҥоттордулар.
Палатка хомуйан туруорарга түргэнник *Сарыал* этэрээт туруорда. География предметинэн ориентирование, дойду аатын билэргэ "Кэскил* этэрээт бастаата.
Узел баайыытыгар *Кустук* этэрээт бастыҥ буолла. Туристарга саамай билэргэ наадалаах "Суһал көмөнү" оҥоруу сорудахха *Кэскил* этэрээтэ бастаата.
Бастаабыттар грамота, минньигэс ас бэлэх туттулар.
Хата, оҕолор сүүрэн- көтөн, оонньоон, күннэрин интэриэһинэйдик, бэһиэлэйдик атаардылар.
11.09.2026 сыл.
" Көмүс бөрүө" медиакиин