РЦНТ «Дом Олонхо» им. Г.Г. Колесова

"УУС КЫҺАТА АРЫЛЫННА"


Бүгүн Хотой Айыы таҥаралаах алтынньы ый 3 күнүгэр ырыаһыт-тойуксут, уран тарбахтаах уус дьон уутуйан олорбут Төхтүр сиригэр-уотугар дьоһун түһүлгэ тэрилиннэ. Хомпу үрэх тардыылаах Тиэлиги сиригэр туруу үлэһит, элбэх оҕолоох, айар тутар талааннаах Кирилиннэр дьиэ кэргэҥҥэ кыптыый тутан кылырданан кыыс оҕо буолан күн сирин көрбүт Татьяна Власьевна Неустроева күн бүгүн сүрэҕин баҕатынан, илиитин сылааһынан тутан-оҥорон таһаарбыт “Уус кыһатын” арыйар долгутуулаах тэрээһинэ ыытылынна. Айылҕа талаанынан-дьоҕурунан маанылаабыт кыыһа Татьяна Власьевна кыра оҕо эрдэҕиттэн бары үлэҕэ сыстаҕас, кыайыгас-хотугас, тыа оҕотун быһыытынан оттоон-мастаан, сүөһү-ас көрсөн, улаатар сааһыгар ыллыыр-туойар дьоҕура арыллан, түһүлгэлэргэ туойар, оһуохайдыыр буолан барбыта. Эт сиин өттүнэн кыайыгас-хотугас Татьяна Власьевна волейболга, от охсуу күүлэй күрэхтэригэр, уһун сүүрүүлэргэ ситиһиилээхтик кыттар. Айар-тутар, талааннаах тарбаҕа батарбакка иискэ-ууска сыһыана өтөн Намнааҕы педагогическай колледжка үөрэнэн билиитин-сатабылын кэҥэтэн дьахтар киһиэхэ ураты дьарыгынан, муоһунан, көмүһүнэн-алтанынан умсугуйан үлэлээн барбыта, кэнники кэмнэргэ ууска сыстан быһах охсор, тимири ууһаарыыга уустары кытары тэбис тэҥҥэ илин кэлин түсүһэр, күн бүгүн тимири тимиргэ силимниир сыбаарка үлэтин баһылаата.
"Уус кыһата" арыллар дьоһун түһүлгэтин Гавриил Колесов аатынан Олоңхо Дьиэтин, Дьанхаады нэһилиэгин сынньалаң киинин үлэһиттэрэ иилээн са5алаан тэрийдилэр, алгысчыт Денис Оконешников аал уотун оттон, Айыыларыгар хайыһан уус төрдө Кудай Бахсы саҕаттан аал уот иччитэ Аан Уххан Бырдьа Бытык Хатан Тэмиэрийэ иччитигэр сүгүрүйэн алгыһын түстээтэ. Үөрүүлээх түһүлгэ5э Дьанхаады нэһилиэгэ тыа сирин түөлбэтин баһылыга Алексей ШАРИН, Гавриил Колесов аатынан Олоҥхо Дьиэтин салайааччыта Айта ВАСИЛЬЕВА, Иван Михайлович Романов аатынан Төхтүрдээҕи орто оскуола директора Николай РОМАНОВ, СР норуотун маастара, Мэҥэ Хаҥалас улууһа тимир уустарын түмсүүтүн салайааччыта. Леонид ГОВОРОВ, Мэңэ тимир уустара Дьулус МАРКОВ, Елисей БАИШЕВ, Валентин СИДОРОВ, Иннокентий ЗАХАРОВ уонна Уус Алдан улууһун тимир уустара Андриан КОЛЕСОВ, Петр ПЕТРОВ э5эрдэлээтилэр .
Былыргы дьыллар мындааларыгар, урукку сыллар уорҕаларыгар мындыр өйдөөх саха омук хататтаах, чокуур таастаах, кыалаах сылдьар буолара. Хатат – тимир ууһа анаан хатаран оҥорбут икки өттүнэн токурдаах тимир лоскуйа. Чокуур - таас хайа тэллэҕэр, үрэх, өрүс биэрэгэр мунньуллубут хабыр таастартан булуллар. Кыа диэн – хатыҥ маска үүнэр кунаах.  Бу үс тэрил бииргэ сылдьар буоллахтарына эрэ уот күөдьүтүллэр. Күн бүгүн саха Уус кыһатын үөрүүлээх арыллыытыгар Мэңэ тимир уустара Дьулустаан Марков, Валентин Сидоров, Елисей Баишев, Иннокентий Захаров сарсыарда эрдэттэн айаннаан кэлэн Уус кыһата арыллар түгэнигэр анаан минээн балта балталаан, күөрт күөртээн хатат о5устулар. Бу саңа уһаарыллан хатарыллан тахсыбыт хататынан Татьяна Власьевна сиэрин ситэрэн, туомун тутуһан Уус кыһатын аал уотун сахта, тойук туойан доллоһутта. Кэлбит ыалдьыттар алгыстаах салама баайан Татьяна Власьевна саңа тутуллубут ууһун кыһатыгар киирэн уус уран быыстапканы көрдүлэр, суостаах уотунан уһаарар уус оһо5ун тула мустан быһах о5устулар.
Уус кыһатын арыйбыт үөрүүлээх күнүнэн Татьяна Власьевнаны чугас дьоно, до5отторо, бииргэ үөрэммит үөлээннээхтэрэ, коллегалара, кэргэнэ о5олоро истиң тылларынан э5эрдэлээтилэр, хардатын Татьяна анаан минээн охсубут былыргылыы быһыылаах тоһо5олорун бэлэх уунна. Бииргэ алтыһар үөлээннээхпитигэр Мэңэ Хаңалас улууһугар со5отох дьахтар уус Татьяна Власьевна5а уһанар кыһатыгар аал уота күөдьүйэ умайдын, айар са5ахтар арыллан истиннэр, айымньылаах үлэни, чэгиэн туругу, олоңхо тэңэ уйгулаах оло5у ба5арабыт.
Гавриил Колесов аатынан Олоңхо Дьиэтин салайааччыта
Айта Васильева.

🔸🔹🔸🔹🔸🔹🔸🔹🔸🔹🔸🔹🔸🔹🔸🔹🔸🔹🔸🔹🔸🔸🔹🔸🔹🔸 «АЛЕКСАНДРА БАИШЕВА РОССИЯ НОРУОТУН МААСТАРА АЛБАН ААТТАННА»

Бүгүн, о.э балаҕан ыйын 25 күнүгэр Төҥүлү нэһилиэгэр үөрүүлээх, дьоро, дьоһун тэрээһин ыытылынна. Өбүгэ төрүт үгэстэрин, ииһин-ууһун сүҥэн илдьэ сылдьар, бар дьонугар үөрэтэр, тарҕатар, үйэтитэр ытыктыыр, сүгүрүйэр киһибит, айар талааннаах, уран тарбахтаах Мэҥэ Хаҥалас улууһун сатабыллаах маастара, "Дархан Ууһа" , А.П. Скрябина аатынан үрүҥ көмүс бэлиэ хаһаайына, СР уус уран оҥоһуктарын маастара, СР норуотун маастара Александра Семеновна Баишева "Россия норуотун маастара" албан ааты ылла. Дьабыыл кэрэ сириттэн төрүттээх-уустаах Александра Семеновна Баишева Төҥүлү нэһилиэгэр өр кэмнэргэ оҕо уһуйааныгар таһаарыылаахтык, ис сүрэҕиттэн оҕолор, инники кэскиллэрбит туһа диэн бэриниилээхтик үлэлээбитэ. Оҕо эрдэҕиттэн иистэниэн баҕата баһыйан ийэтиттэн мөҕүллэн да туран иис-уус абылаҥар ылларбыта. Оҕо уһуйааныгар үлэлиир сылларыгар, оччотооҕуга оонньуур кырыымчык кэмигэр бэйэтэ толкуйдаан, мындырдаан оҕолорго анаан остуоруйалар персонажтарынан сымнаҕас оонньуурдары ( мягкие игрушки) , сыахайдары , маһынан конструктордары оҥорор үлэтин тус сатабылын республикаҕа киэҥник тарҕаппыта. Кэлиҥ ииһинэн утумнаахтык дьарыктанан, култуура уонна спорт эстафетатын, улууска, республикаҕа ыытыллар араас көрүүлэргэ ситиһиилээхтик кыттан барар. Ордук сөбүлээн түүлээҕинэн, кылынан-сэлинэн дьарыгырар, сүүстэн тахса андаатартан, күндү түүлээхтэн дьахтар саҕынньаҕын, ааҕан бүппэт элбэх таба тыһыттан этэрбэстэри, эркиҥҥэ ыйанар, наара ороҥҥо сыттанар тэллэхтэри, көбүөрдэри, араас элбэх паннолары, сөрүөлэри, оҥоһуктары оҥорор. Төҥүлүтээҕи "Доруобуйа" түмсүү иһинэн үлэлэһэн бэйэтин тула биир санаалаахтарын, үөрэнээччилэри түмэн бэйэтин сатабылын, билиитин киэҥник тарҕатар. Ытыктабыллаах Александра Семеновна быйыл 89 хаарын санныгар түһэринэр, киһи сөҕүөн курдук эдэрдии эрчимнээхтик, сылайары аахсыбакка билигин даҕаны күннэри-түүннэри сөбүлүүр дьарыгын-ииһинэн дьарыктанар, күн аайы кини дьиэтигэр ыалдьыт-хоноһо үгүс, алтыһар, үөрэтэр дьоно, үөлээннээхтэрэ "Эбээбит билигин да ачыкыта суох инньэҕэ сабы таах угар" диэн сэһэргииллэр. Бүгүҥҥү үөрүүлээх күҥҥэ Александра Семеновнаҕа "Россия норуотун маастара" 100 нүөмэрдээх дастабырыанньаны уонна түөскэ иилиллэр бэлиэни СР Ил Түмэн судаарыстыбаннай мунньаҕын Тыа сирин түөлбэтигэр уонна аграрнай политикаҕа сис кэмитиэт бэрэссэдээтэлэ Андрей Михайлович Находкин туттарда. Мэҥэ Хаҥалас улууһа МТ баһылыгын 1 солбуйааччыта Гаврил Николаевич Толстяков, Төҥүлү нэһилиэгэ тыа сирин түөлбэтин баһылыга Петр Васильевич Эверстов, Дьабыыл нэһилиэгэ тыа сирин түөлбэтин баһылыга Дмитирий Дмитриевич Петров, Мэҥэ Хаҥалас улууһун култуураҕа уонна духуобунай сайдыыга салалтатын салайааччы эбээһинэһин толорооччу Александр Сергеевич Кулешов, Гавриил Колесов аатынан Олоҥхо Дьиэтин салайааччыта Айта Семеновна Васильева, Төҥүлү нэһилиэгин "Эйгэ" сынньанар киинин салайааччыта Александра Федоровна Баишева, "Доруобуйа" түмсүү салайааччыта Надежда Николаевна Оконешникова, оҕолоро, сиэннэрэ уо.д.а истиҥ эҕэрдэлэрин, махтал тылларын эттилэр. Ытыктабыллаах айар талааннаах Александра Семеновнаҕа чэгиэн туругу, оҕолорун, сиэннэрин тапталларыгар угуттанан өссө да дьоллоох, уйгулаах олоҕу, өссө да Төҥүлүн, Дьабыылыҥ дьонугар-сэргэтигэр үтүө сүбэҕинэн, айар-тутар айымньылаах үлэҕинэн күүс-көмө буола тур диэн алгыс тылбытын аныыбыт!👏👏👏👏👏👏👏👏👏👏😊

"НАСЛЕДИЕ КОЧЕВНИКОВ" күрэххэ ситиһии☀️
Бу күннэргэ Кыргызстан ытык сиригэр-уотугар VI Аан дойдутааҕы «Игры кочевников" күрэх тэриллэн дьон-сэргэ сөҕөр-махтайар киэҥ түһүлгэтэ төрүттэннэ. Бу киэҥ далааһыннаах тэрээһин чэрчитинэн Аан дойду таһымнаах "Наследие кочевников" төрүт дорҕоон, ырыа-тойук, эпос толоруутун күрэҕэр дойду ааттаах-суоллаах ырыаһыттара-тойуксуттара, эпос толорооччулара Бишкек, Ыссык-Куль куораттар киин түһүлгэлэригэр ылбаҕай ырыаларын, добун тойуктарын дуораһыттылар. Мэҥэ Хаҥалас улууһуттан Гавриил Колесов аатынан Олоҥхо дьиэтин фольклорга уһуйааччыта, олоҥхону толорооччу Аксиния Степанова, 1 Тыыллыма нэһилиэгин Аркадий Алексеев аатынан элбэх хайысхалаах култуура киинин уус-уран салайааччыта, олоҥхону толорооччу Виталий Никифоров ааттаан-суоллаан ыҥырыллан Кыргызстан сиригэр-уотугар тиийэн ыалдьыттаатылар, аан дойду таһымнаах күрэххэ батыҥнары кытары атах тэпсэн олорон олоҥхолорун толордулар. Үс түүннээх күн күрэх кэннэ быйылгы Кэбээйи улууһугар ыытыллыбыт Олоҥхо Ыһыаҕын Кылаан Чыпчаал кыайыылааҕа ВИТАЛИЙ  НИКИФОРОВЫ  "Наследие кочевников" аан дойду таһымнаах күрэххэ 3 үрдэл кыайыылаах аатын ылбытынан итиитик-истиҥник эҕэрдэлиибит, үрдүк ситиһииҥ үөрүүтүн тэҥҥэ үллэстэбит! 👏👏👏👏👏👏😊 Сахабыт Сирин, Мэҥэ Хаҥалас улууһун албан аатын ааттаппыт бастыҥ олоҥхону толорооччуларбытыгар, биир дойдулаахтарбытыгар  Виталий Никифоровка, Аксиния Степановаҕа алаас ааттаахтара, дойду сурахтаахтара тоҕуоруһа мустубут дьоһун түһүлгэлэригэр Саха Чулуу Олоҥхотун, ырыатын-тойугун  иһитиннэрэн, бар дьон сэҥээриитин, сөҕүүтүн-махтайыытын ылбыккытынан киэҥ туттабыт! 👏👏👏👏😊

Хаатылымаҕа Айыы балаҕана☀️

Билиҥҥи дьалҕааннаах кэмҥэ Саха дьоно итэҕэлбитэр, сиэрбитигэр-туоммутугар эргийдэхпитинэ бигэ туруктаах, түмсүүлээх буолуохпут. Бүгүн балаҕан ыйын 5 күнүгэр Хаатылымаҕа Аан дойдутааҕы норуот эмчиттэрин ассоциациятын магистра, дойдулар икки ардыларынааҕы категориялаах гипнотизер- экстрасенс Валентина Ивановна Уваровская аатынан Айыы балаҕанын үөрүүлээх аһыллыытын дьоро малааһына ыытылынна. Үтүө киһи Валентина Уваровская албан аатын ааттатаары аймах-билэ дьоно, Хаатылыма олохтоохторо сүрэхтэрин баҕатынан, норуот күүһүнэн өр кэмнэргэ ыра гыммыт баҕаларын толорон Айыы балаҕанын тутун олоххо киллэрдилэр. Алгысчыт, олоҥхону толорооччу Гаврил Спиридонов алгыс тылын амалыйан Айыы балаҕанын аһыллыытын алгыһын көтөхтө, сэргэ туруоруутун сиэрин-туомун тэрийдэ. Хаатылыматтан төрүттээх - уустаах СӨ үтүөлээх этээччитэ Валентина Федорова өрө көтөҕүллэн саҥа сэргэ тула төрүт түһүлгэни төрүттээн оһуохай тылын таһаарда. Валентина Уваровская сиэн быраата, олоҥхоһут, М.К. Аммосов аатынан ХИФУ доцена Юрий Борисов көмүлүөк оһох таһыгар аас тэллэх үрдүгэр оллоонноон олорон "Баһырҕастаах аттаах Баабый Баатыр" олоҥхотун бар дьоҥҥо толорон иһитиннэрдэ. Саха дьонун үтүө үгэһинэн кэлбит дьону барытын сахалыы мааны астаах сандалы тула ыҥыран күндүлээтилэр-маанылаатылар. Ыраахтан-чугастан ыҥырыллан кэлбит ытык мааны ыалдьыттар, аймах - билэ дьоннор үөрүүлээх түһүлгэҕэ сүргэлэрэ көтөҕүллэн туран үөрүүлэрин үллэһиннилэр, Хаатылыма сирин-уотун үтүө дойду оҥостубут ытыктыыр ырыаһыппыт, мелодист Аркадий Михайлович Алексеев, СӨ норуодунай худуоһунньуга Кирилл Петрович Гаврильев- Кинтэн, улуустааҕы култуураҕа уонна духуобунай сайдыыга салалта салайааччытын эбээһинэһин толорооччу Александр Сергеевич Кулешов, Гавриил Колесов аатынан Олоҥхо Дьиэтин салайааччыта Айта Семеновна Васильева, алгысчыт Денис Викторович Оконешников, Бэтэрээннэр улуустааҕы сэбиэттэрин бэрэссэдээтэлэ Евдокия Саввична Решетникова, Майатааҕы И.Г.Тимофеев аатынан лицей саха тылын учуутала Тамара Егоровна Слободчикова, Валентина Уваровская Далбар Хотун балтылара, 2 Тыыллыма нэһилиэгин баһылыга Айсен Русланович Спиридонов уо.д.а эҕэрдэ истиҥ тылларын эттилэр. Бу курдук бүгүҥҥү үтүө мааны күҥҥэ Айыы балаҕана тутуллан аанын арыйда, аар сэргэ анньылынна, аны көмүлүөк оһох аал уота күүдэпчилэннин, алаадьытын сыта ыраахха диэри тунуйдун, сылаас, сырдык Айыы балаҕана бар дьон түмсэр үтүө түмэлэ буоллун!
Г.Г.Колесов аатынан Олоҥхо Дьиэтин салайааччыта Айта Васильева.

☀️Бүтүн дойду таһымнаах күрэхтэн ситиһиилээх.☀️
Бэҕэһээ атырдьах ыйын 14 күнүгэр Мэҥэ Хаҥалас улууһун туойдьуттара, айар талааннаахтара Валентина Егорова "Туойаана" Майаттан, Марина Оконешникова Павловскайтан, Марианна Маркова Таба5аттан, Дария Птицына Майаттан, Прасковья Лебедева Төҥүлүттэн Чурапчы улууһун Төлөй-Дирин сиригэр - уотугар аан бастакынан ыытыллыбыт Бүтүн дойдутааҕы "Туойдьут Төлөйдөр" бэстибээлгэ кыттан кэллилэр. Тэрээһиҥҥэ СР култуураҕа уонна духуобунай сайдыыга министр Афанасий Ноев, "Симэх" национальнай искусство киинин салайааччыта Яна Игнатьева кыттыыны ыллылар. Ардах, суол-иис харгыһын аахсыбакка элбэх дьон-сэргэ мустубутуттан тэрийээччилэр астыммыттарын, махталларын биллэрдилэр. Бүтүн дойдутааҕы "Туойдьут төлөйдөр" бэстибээлгэ кыттыыны ылан биһиги туойдьуттарбыт ситиһиилээх кэллилэр:
☀️А.А.Саввин "Гончарное ремесло Якутов" кинигэтигэр референстар түһүмэххэ Валентина Егорова "Туойаана" Майа
"Магия глины" бастыҥ анал аат 👏👏👏👏👏👏😊☀️"Саха Дьөһөгөй таҥаралаах" түһүмэххэ Петр Егоров "Туойаана" Майа 2 үрдэл кыайыылаах👏👏👏👏👏😊☀️ "Саха Дьөһөгөй таҥаралаах" түһүмэххэ Марина Оконешникова 3 үрдэл кыайыылаах таҕыстылар👏👏👏👏👏😊Киэҥ далааһыннаах тэрээһинтэн ситиһии эҥэрдээх, улууспут аатын ааттаппыт айар талааннаах туойдьуттарбытын итиитик-истиҥник эҕэрдэлиибит! Айар-тутар талааҥҥыт сайдан, сонун -ураты толкуйдар сүүрүк курдук дохсуннук кимэн киирэн истиннэр!

а  көрдүбүт, дьиэ кэргэн бэйэ бэйэҕэ истиҥ сыһыаннара, тапталлара, өйөбүллэрэ-өйдөһүүлэрэ бииртэн биир ситиһиилэргэ-кыайыыларга кынаттыырын тус холобура буоллулар.
            Бар дьоммутун “Күн Дьөһөгөй дьикти эйгэтигэр”  ураты истиҥ уу-уран быыстапканы көрүҥ, сэргээҥ диэн атырдьах ыйын 27 күнүгэр дылы Дьокуускай куорат Лермонтов аатынан  35/1 уулуссаҕа “Үргэл” арт-галереяҕа сэрэдэ-баскыһыанньа 10.00-18.00 чааска дылы ыҥырабыт!
Айта Васильева
Г.Г. Колесов аатынан оройуоннааҕы норуот айымньытын киинэ “Олоҥхо Дьиэтин” салайааччыта.

“КҮН ДЬӨҺӨГӨЙ ДЬИКТИ ЭЙГЭТИГЭР”
Атырдьах ыйын  6 күнүгэр Дьокуускай куорат “Үргэл” арт – галереятыгар “Күн Дьөһөгөй дьикти эйгэтигэр”  худуоһунньук – керамист, “Айар кут” мастарыскыай салайааччыта, Нөөрүктээйи нэһилиэгин норуотун маастара Марина ОКОНЕШНИКОВА бастакы айар быыстапкатын үөрүүлээх аһыллыыта ыытылынна.
“СПИД СТАР” киинэттэн саҕалыах...
“Спид Стар” сүүрүк ат туһунан умсугутуулаах саха киинэтин көрбүт буоллаххытына сүрүн дьоруой уоллаах кыыс истиҥ тапталларын устуоруйатын, хайдах курдук дьаныһан, сыралаһан, биир санааларын холбоон сүүрүк ат Спид Стар саха атын спордугар аатын-суолун хаалларбытын билэҕит. Киинэ сүрүн геройдарын прототиптара Марина уонна Егор Оконешниковтар тус олохторо киинэҕэ киирбитэ мээнэҕэ буолбатах. Марина кыыс кыра оҕо эрдэҕиттэн сылгыга ураты чугас сыһыаннаах, аты таптыыр оҕо этэ, Табаҕатааҕы оҕо музыкальнай оскуола уруһуй салаатын ситиһиилээхтик бүтэрбитэ.  Оскуоланы бүтэрэн баран кыыс оҕоҕо олус ураты Рязань куоракка “Тренинг лошадей и подготовка всадников” идэтин баһылаабыта, ол кэннэ уруһуйдьут буолар баҕатын толорон П.П. Романов аатынан Дьокуускайдааҕы художественнай колледжка үөрэнэн “Дизайнер” идэтин баһылыыр. Марина тапталлаах олоҕун аргыһа ааттаах-суоллаах, СР Ил Дарханын 5 төгүллээх кыайыылааҕа  жокей-тренер Егор Оконешников буолар, кинилэр бастакы билсибит күннэриттэн, ыал буолуохтарыттан олохторо бүтүннүү сүүрүк аттары тула буолбута. Биллэн туран Марина айар-тутар үлэтэ эмиэ сүүрүк аттар тула хайысхаламмыта, туох да кэтэмэҕэйдээһинэ суох сүрэҕэ тугу сөбүлүүрүнэн, санаата ханна сытарынан, олоҕо туохха анаммытынан киистэни ылан ыраас холустаҕа сүүрүк ааттар мааны быһыыларын, үтүө дьүһүннэрин утаппыттыы умсугуйан уруһуйдаан барбыта. Марина Оконешникова уруһуйдарыгар аатырбыт сүүрүк аатар Спидстар, Кылбар, Джокер, Майн Кениг уонна да атыттар кулгаахтара чөрөйөн, сиэллэрэ өрүкүйэн, сирэйдэрэ харахтара туран, дьоһумсуйан тураллара, өрө көтүтэн иһэллэрэ барыта баар.  Олоҕун аргыһа Егор Оконешников Спид Стар атын үрдүгэр олорон кыайыыга дьулуурдарын, биэтэккэ тиийэр өрөгөйдөөх түгэннэрин көрөҕүт...
Талааннаах киһи барытыгар талааннаах...
Дьоҕур, талаан киһиэхэ бартыгар бэриллибэт, маны сэргэ айар тутар аналлаах киһи сүрэхтээх-үлэһит, талбыт идэҕэ бэриниилээх, саҥаттан саҥа суоллары тобулар, ураты хайысхалары талан холонон көрөр буоллаҕына сайдар суола кэҥиир, сатабыла үрдүүр. Марина Оконешникова кэлиҥҥи сылларга улаханнык умсугуйан туойунан  умсугутуулаахтык дьаныһан туран дьарыктанна, манна кини уһуйааччынан биир дойдулааҕа уһуйаан, оскуола сааһыттан иитээччитин, учууталын СР уус-уран оҥоһуктарын маастара Марианна Викторовна Маркованы ааттыыр киниэхэ муҥура суох махтанар.  Марина туойунан уран тарбахтарынан ууран-тутан оҥорбут үлэлэригэр ат, сылгы арааһа олус элбэх... Манна көрүөн оҕолорун батыһыннарбыт, сүүрүк аттары төрөппүт Совдияны, “Кыыс түүлэ” аты мииммит кыыһы, Өлүөнэ эбэни өксөйөн харбаан иһэр сылгы үөрүн, туой иһиккэ силимнэспит сылгылары уонна да ураты элбэх оҥоһуктары...
Аан бастакы уус-уран быыстапка...
            Айар-тутар дьоҕурдаах Марина Оконешникова олоҕор биир дьоһун уонна долгутуулаах “Күн Дьөһөгөй дьикти эйгэтигэр”  аан бастакы уус уран быыстапката олус истиҥник-иһирэхтик, бэйэтин курдук олус ис киирбэхтик ыытылынна. Тэрээһини ыытааччы Роман Алексеев-Амор иилээн – саҕалаан ыытта, аатырбыт хомусчут Юлияна Кривошапкина-Дьүһүйээнэ киэргэттэ.  “Үргэл” арт-галерея салайааччыта, Россия үтүөлээх худуоһунньуга, СӨ народнай худуоһунньуга  Юрий Спиридонов ис сүрэҕиттэн  Марина Оконешникованы эҕэрдэлээтэ, бу арт-галереяҕа улуу худуоһунньуктар айар быыстапкалара турбутун, онтон Марина уруһуйдара сүүрүк аттары тула буолан биир ураты уонна саҥа көстүү буолбутун бэлиэтээтэ. Кэлбит ыҥырыылаах ыалдьыттар айар – тутар талааннаах Марина Оконешникованы ис сүрэхтэриттэн эҕэрдэлээтилэр, уус-уран быыстапканы умсугуйа көрдүлэр. Бу киэһэ тус олохторун толору сүүрүк сылгыларга анаабыт Марина Егор Оконешниковтары уонна кинилэр талбыт курдук уоллаах кыыс оҕолорун бука бары олус хайҕыы, киэн тутт

Андросов фест тэрээһиҥҥэ маастар-кылаастар...

Мааны Майа Хомсомуол болуоссатыгар атырдьах ыйын 7 күнүгэр биллиилээх автор, мелодист Виталий Андросов төрөөбүтэ 75 - сылыгар анаммыт "Андросов фест" киэҥ ис хоһоонноох тэрээһин, норуот күүлэйэ ыытылынна. "Мэҥэ Уус" айар талааннаахтар түмсүүлэриттэн уран тарбахтаах иистэнньэҥнэрбит кэлбит дьоҥҥо араас хайысхалардаах, бииртэн биир ураты дьарыктары, маастар-кылаастары ыыттылар, атыы-эргиэн дьаарбаҥын тэрийдилэр. Төҥүлүттэн СР уус-уран оҥоһуктарын маастара Лидия Николаева "Валяние" техникатынан субу көтөн тахсан чыыбыгырыы ыллыах курдук чыычаахтары оҥотторон дьону сэргэни умсугутта. Төҥүлүттэн Александра Андросова, Вера Шестакова түөскэ анньыллар "Брошь" оҥоттордулар. Хаптаҕайтан СР уус уран оҥоһуктарын маастардара Лена Лукина кыбытык тигиигэ, быысабайга үөрэттэ, Мария Сивцева кылтан-сиэлтэн оҥоһуктарга үөрэх ыытта. Дьанхаады нэһилиэгиттэн Мэҥэ Хаҥалас улууһун сатабыллаах маастара Татьяна Неустроева алтан киэргэллэри-симэхтэри, Майаттан Наталия Туманова, Ходороттон Ньургуйаана Дмитриева олус үчүгэй "Брошь", "Күлүүс ыйыыр" үөрэхтэригэр элбэх оҕолор сырыттылар. "Уран Майа" түмсүүлэр, салайааччы СР уус-уран оҥоһуктарын маастара Надежда Сергеева, иискэ маастар кылаастары, атыы-эргиэн эгэлгэтин тэрийдилэр. Моорук Суолатын талба талааннаах кыргыттара Римма Егорова, Нарыйа Иванова Суола үрэх кытылар үүммүт кэрэ сибэккилэри, эмтээх оттору, отоннору хомуйан минньигэс кэмпиэттэри оҥорторбуттарын дьон олус сэргээтилэр, аныгы гиипсэ материалыттан араас сувенирдары, шкатулкалары оҥоттордулар. Талба талааннаах Туйаара Егорова туостан мааны оҥоһуктары оҥоттордо. Бу курдук сайыҥҥылыы сылаас күҥҥэ дьон -сэргэ үөрэ көтө саҥа билии, сатабыл эбинэн, сүрэх үөрэр, харах хайҕыы көрөр оҥоһуктарын бэйэ илиилэрин сылааһынан оҥорон астыннылар, дуоһуйдулар, бу күнү тэрийбит, билиилэрин-сатабылларын үллэстибит "Мэҥэ Уус" айар талааннаахтарыгар махталбытын биллэрэбит!
Айта Васильева Г.Г.Колесов аатынан Олоҥхо Дьиэтин салайааччыта.