МБУ НКЦ "Айыы Тайбыт"

*«Айыы Тайбыт» КК иһинэн үлэлиир ТОЙУК куруһуогар суруйтарыҥ!*

_Куруһуокка тойукка үөрэтиэ СӨ култууратын туйгуна, Өрөспүүбүлүкэтээҕи Дьахтар чулуу тойуксута Анна Егоровна Матвеева._

💡*Дьарыктар «Айыы Тайбыт» КК, нэдиэлэҕэ биирдэ (сэрэдэ күн) 17:00 чаастан буолаллар.*
📆 *Үөрэх саҕаланыыта — алтынньы 7 күнүгэр 17:00 ч*

👧🏽👦🏽*Сааһа хааччаҕа суох, ким баҕалаах*

✍️ Бу ватсаапка суруйан суруйтарыҥ:
📞 8 (914) 111-46-63

*«Айыы Тайбыт» КК иһинэн үлэлиир ФОЛЬКЛОР куруһуогар суруйтарыҥ!*

_Куруһуокка айар кыаҕы арыйыы, сөпкө тыыныы ньымаларга, фольклор араас көрүҥнэригэр үөрэтиэ МБУ ДО «НДШИ» учуутала Айна Николаевна Семенова._

💡*Дьарыктар «Айыы Тайбыт» КК, нэдиэлэҕэ биирдэ (сэрэдэ күн) 17:00 чаастан буолаллар.*
📆 *Үөрэх саҕаланыыта — алтынньы 7 күнүгэр 17:00 ч*

👧🏽👦🏽*Сааһа: 1-11 кылаас оҕолоругар, ыччакка, 50+ саастаахтарга*

✍️ Бу ватсаапка суруйан суруйтарыҥ:
📞 8 (914) 111-46-63

📚*Сүлэ нэһилиэгин 190 үбүлүөйдээх сылыгар ананан тахсар кинигэҕэ предзаказ харчы хомуйуута биллэриллэр.*

🗓 _*Хомуйуу 22.09.2026 күнтэн саҕаланар.*_
💰 _*Кинигэ сыаната — 3500 солк.*_

📔 Баҕалаахтар харчыны наличканан Екатерина Андреевнаҕа, эбэтэр 89141114663 нүөмэргэ Марина Фрументьевна Сбербанк картатыгар ыытыаххытын сөп. ❗*_Харчы ыытан бараҥҥыт ватсаап суруйуоххутун наада, биһиги эһигини ведомость испииһэгэр киллэриэхпит._*

➡️ +7 964 428-51-18 нүөмэргэ эрийэн, суруйан билсиэххитин сөп.

*Үбүлүөйдээх кинигэ таһаарыытын өйүөҕүҥ!* 📚

💟Бүгүн, алтынньы 5 күнүгэр, Учууталлар күннэригэр анаммыт үөрүүлээх түгэҥҥэ, С. С. Сюльскай аатынан орто оскуола кэллэктиибигэр, үөрэнээччилэригэр Матвеева Анна Егоровна, Филиппов Егор Гаврильевич-Буутабыс оҕолорун аатыттан, 190 үтүө дьыалаҕа кыттыһан, оскуола оҕолоругар анаан Емельянов Владимир Петрович айан таһаарбыт сахалыы «Хомуур оонньуу» оонньуутун эҕэрдэлээн туран туттарда. Бу — 62 үтүө дьыала буолла.

Күндү учууталлар, үөрэҕирии бэтэрээннэрэ!

Айымньылаах, таһаарыылаах өрө көтөҕүллүүгүт, идэҕитигэр бэриниилээх буолуугут кыыма, оҕоҕо истиҥ тапталгыт хаһан даҕаны уостубатын. Кытаанах доруобуйаны, үрдүк үктэллэри, саҥа идиэйэлэри уонна бырайыактары баҕарабыт. Дьолу-соргуну, тапталы уонна этэҥҥэ буолууну!

Учуутал күнүнэн итии истиҥ эҕэрдэ!💐

💟 Бүгүн, алтынньы 5 күнүгэр "Айыы Тайбыт" култуура киинигэр «Эрэл» түмсүүгэ сэтинньи ыйга барыахтаах маскировачнай сеткалары өрсө интернат иитиллээччилэрэ, интернат уонна оскуола үлэһиттэрэ Нюргустана Джулустановна, Саргылана Егоровна, Тамара Самуиловна көмөлөстүлэр.
4 миэтэрэ уһуннаах, 2 миэтэрэ иэннээх икки маскировачнай сетканы өрөн бүтэрдилэр. Оҕолор — наһаа маладьыастар! Бүгүн бу үтүө дьыалаҕа оскуола оҕолоро, улахан дьон, тэрилтэ үлэһиттэрэ бары кыттыспыттара олус үөрдэр. Үтүө дьыалаҕа кыттыспыт дьоммутугар барҕа махтал буолуохтун!

💟 Бу — 63-с үтүө дьыала бүгүҥҥү күҥҥэ.

Билигин биһиги түмсэммит бары биир киһи курдук анал байыаннай дьайыыга сылдьар уолаттарбыт этэҥҥэ дьиэлэригэр эргиллэн кэлэллэригэр, барыта этэҥҥэ түмүктэнэригэр баҕарыаҕыҥ уонна үлэлэһиэҕиҥ. ✊

Сүлэ нэһилиэгэр аҕам саастаахтар декадалара үөрүүлээхтик арылынна.

Баһылык Дмитрий Юрьевич Иванов Аан дойдутааҕы аҕам саастаах дьон күннэринэн эҕэрдэлээн туран, дьаһалта уонна кыра тэрилтэлэр ааттарыттан быйылгы үбүлүөйдээх олохтоохторго өйдөбүнньүк бэлэхтэри, эҕэрдэ суруктары туттарда. Ону тэҥэ үбүлүөйдээх дьону оскуола кэлэктиибин аатыттан Илья Вячеславович Герасимов, «Улыбка» уһуйаан кэлэктиибин аатыттан Валерия Михайловна Николаева, олох-дьаһах коммунальнай хаһаайыстыба Сүлэтээҕи участогын кэлэктиибин аатыттан Александр Афанасьевич Иванов эҕэрдэлээтилэр. Эҕэрдэ ырыаларын бэлэхтээтилэр Раиса Иванова уонна Максим Рожин.

Култуура уонна олохтоох бибилэтиэкэ үлэһиттэрэ кэлбит ыалдьыттары көрдөөх оонньуулары тэрийэн сэргэхситтилэр, кыайыылаахтарга бириистэри туттардылар. Ытык-мааны аҕам саастаах дьоммут сандалы остуол тула ирэ-хоро кэпсэтэн, ааспыты ахтыһан-санаан, көрдөөх оонньуулары оонньоон, эҕэрдэ нүөмэрдэрин көрөн, үҥкүүлээн астынан тарҕастылар.

Кыттыыны ылар аҕам саастаахтарбытыгар барҕа махтал, куруук маннык чэгиэн, көхтөөх буолуҥ.

Алтынньы 2–10 күннэригэр Сүлэ нэһилиэгэр аҕам саастаахтарга аналлаах декада ыытыллар. Кулууп, бибилэтиэкэ, дьахтар сэбиэтэ, олохтоох дьаһалта үлэһиттэрэ араас тэрээһиннэри ыытыахтара. Кэлиҥ, сылдьыҥ, кыттыыны ылыҥ!

СҮЛЭ НЭҺИЛИЭГИН КИИРИИ ААРТЫГА АРЫЛЫННА УОННА МОДУЛЬНАЙ УСПУОРТ СААЛАТЫН АКЫЛААТА ТҮСТЭ.

Ханнык баҕарар нэһилиэккэ, улууска тиийдэххинэ, аан бастаан киирии аартыкка киһи хараҕа быраҕыллар. Киирии аартык — нэһилиэк көстүүтэ. Ол курдук Сүлэ нэһилиэгин олохтоохторугар бүгүн, алтынньы 2 күнүгэр, улахан үөрүүлээх түгэннэр буоллулар.

Бастатан, «Сүлэ нэһилиэгэ» киирии аартык үөрүүлээх арыллыыта буолан ааста. Тэрээһин саха үгэһинэн — алгыстан — саҕаланна. Алгысчыт Алиса Михайловна сахалыы сиэринэн Үрдүк Айыылартан көрдөһөн-ааттаһан, айах тутан ыытта.

Киирии аартык үөрүүлээх арыллыытыгар нэһилиэк баһылыга Дмитрий Юрьевич Иванов бу бырайыак олохтоох көҕүлээһиннэри өйүүр бырагырааманан тутуллан, олоххо киирбитинэн, нэһилиэк дьонун-сэргэтин, ытык ыалдьыттарын итиитик-истиҥник эҕэрдэлээтэ.

«Сүлэбитин киэргэтэр биир бастыҥ, үйэлээх тутуу оҥоһуллубутунан киэн туттабыт, дойдубут көстүүтэ киэркэйэрин туһугар элбэх үлэ ыытылла турарыттан истэн-көрөн үөрэбит, астынабыт», — диэн Василий Иванович Тимофеев эҕэрдэ тылын эттэ.

Үөрүүлээх чааска Сүлэ нэһилиэгин Аҕа баһылыга Дмитрий Юрьевич Иванов, Сүлэ нэһилиэгин бочуоттаах олохтоохторо Светлана Гаврильевна Петрова уонна Василий Иванович Тимофеев аалай лентаны быстылар.
Үйэлээх, дьоһун тутуулаах "Сүлэ нэһилиэгэ" киирии аартык ыраахтан-чугастан айанныыр дьону арчылыы, алҕыы туруо.

Салҕыы биир үөрүүлээх быһыы — бу Модульнай успуорт саала тимир акылаатын түһүүтэ. Успуорт саала уораҕайа «Мин Сахам сирэ XXI үйэҕэ» үтүө дьыала бырагырааматынан тутуллар. Уопсай иэнэ 624 кв.м. тэҥнэһиэҕэ, манна дьон-сэргэ мээчигинэн эрэ дьарыктаммакка, эбии араас спортивнай көрүҥнэринэн дьарыктанарыгар усулуобуйа баар буолуо.

Саҥа тутуу алгыһын алгысчыт Алиса Михайловна Иннокентьева түһэрдэ. Тэрээһин үөрүүлээх чааһыгар Сүлэ нэһилиэгин Аҕа баһылыга Дмитрий Юрьевич Иванов, Ньурба улууһун ИСУ салайааччытын солбуйааччыта Надежда Васильевна Матвеева, Дьокуускайдааҕы ООО «Колорит» генеральнай директора Станислав Александрович Миронов кыттыыны ыллылар. Кинилэр тутуу үлэтэ хайдах барарын, болдьоҕун уонна саҥа успуорт саала нэһилиэк олоҕор суолтатын туһунан эттилэр, үлэлэригэр ситиһиини баҕардылар.

Тэрээһин долгутуулаах түгэнэ буолан, акылаат түһэн, дьон-сэргэ үөрүүтэ үтүмэн.

Татьяна Николаевна Алексеева салайааччылаах «Айылгы» үҥкүү бөлөҕө эҕэрдэ үҥкүүтүн бэлэхтээтэ, сахалыы сонноох далбар хотуттар алаадьылаах кымыһынан айах тутан күндүлээтилэр.

«Наһаа үөрэн турабын, маннык историческай түгэҥҥэ кыттыбыппыттан. Тутуубут этэҥҥэ баран эһиил үлэҕэ киирэригэр бүк эрэнэбин. Тутааччыларга ситиһиилэри баҕарабын», — диэн Сүлэ нэһилиэгин бочуоттаах олохтооҕо Светлана Гаврильевна Петрова санаатын үллэһиннэ.

Онон алтынньы 2 күнэ Сүлэ нэһилиэгин олоҕор ураты үөрүүлээх, историческай күнүнэн буолла. Киирии аартык арыллан, Модульнай успуорт саала акылаата түһэн, нэһилиэк сайдыытыгар өссө саҥа хардыылар оҥоһулуннулар. Төрөөбүт төрүт дойдубут үүнэ-сайда, чэчирии-чэлгийэ турдун!

✍️Марина Герасимова-Кудай Сыдьаайа Эркин кыыһа

Бүгүн, алтынньы ый 1 күнүгэр, Сүлэ нэһилиэгин эдэр специалистар уопсайдарыгар эбии батареялары туруордулар уонна муостататын тула өттүн барытын ханапаахылаатылар. Сүлэ нэһилиэгин оскуолатыгар үөрэнэр оҕолоох төрөппүттэр, аҕалар көҕүлээн, бэйэлэрин күүстэринэн уонна көмөлөрүнэн, бу үлэ 61 үтүө дьыала чэрчитинэн оҥоһулунна.

Хас биирдии хамсааһыҥҥа, нэһилиэккэ ыытыллар үгүс үлэлэргэ туора турбакка куруук кыттыһар, күүс-көмө буолар эр дьоммутугар барҕа махтал. Эһиги үлэҕит уонна кыһамньыгыт — кэлэр көлүөнэҕэ үтүө холобур, норуот күүһэ-көмүөл күүһэ диэн этии чаҕылхай туоһута буолла.

✍️Марина Герасимова

🍂🍁🍂🍁Убаастабыллаах Сүлэбит нэһилиэгин ытык – мааны аҕам саастаах дьоно!

Аан дойдутааҕы Аҕам саастаах дьон күннэринэн, итиитик – истиҥник эҕэрдэлээн туран, сарсыҥҥы "Ааспыты ахтыһан" сынньалаҥ киэһэҕэ сэргэхсийэн ирэ - хоро кэпсэтиэҕиҥ диэн бука барыгытын ыҥырабыт!
🍁🍁🍁

🍁 Алтынньы 2 күнэ
"ААСПЫТЫ АХТЫҺАН" сынньалаҥ киэһэтэ.

🥗🫖☕Итии чэйдээх сандалы тула ааспыты ахтыһан, араас күрэхтэргэ кыттан, үҥкүүлээн, ыллаан-туойан, оонньооҥ-сынньаныҥ диэн ыҥырабыт.

(Биир суол астаах, аһыыр иһиттээх)

🕒 Саҕаланар: 15:00 ч.
📍 Буолар сирэ: "Айыы Тайбыт" КК

Ытык-мааны Аҕам саастаах дьоммут!

Көмүс саастаах ытык-мааны дьоммутун Аан дойдутааҕы Аҕам саастаахтар күннэринэн итиитик-истиҥник эҕэрдэлиибит!
Үлэҕэ-хамнаска баай уопуккутун, олоххо-дьаһахха муудараскытын, үтүө-мааны майгыгыт үүнэр эдэр көлүөнэҕэ үтүө холобур буоларын билинэбит уонна истиҥник махтанабыт. Төрөөбүт улууспут, нэһилиэкпит тыа хаһаайыстыбатын, социальнай-экэнэмиичэскэй, духуобунай сайдыытыгар уонна култуурунай олоҕор, успуорт көрүҥэр киллэрбит дьоһуннаах кылааккытын үрдүктүк сыаналыыбыт уонна күн бүгүн биһигини кытта тэҥҥэ үлэлии-хамсыы, айа-тута, сүбэлии-амалыы сылдьаргытыттан нэһилиэк бары олохтоохторо үөрэбит уонна Эһиэхэ сүгүрүйэбит!

Күндү Аҕам саастаах ытык-мааны дьоммутугар, Эһиэхэ барыгытыгар чэгиэн-чэбдик доруобуйаны, өссө да өр сылларга биһигини үөрдэ-көтүтэ, сүбэ-ама буола, этэҥҥэ сылдьаргытыгар баҕарабыт! Кырдьыы кыттыспатын, ыарыы ыалласпатын, чугас дьоҥҥут тапталларыгар бигэнэн уһун үйэлэниҥ!

Олохтоох дьаһалта

Алтынньы ый 2 күнүгэр Сүлэ нэһилиэгин олохтоохторун уонна ыалдьыттарын үөрүүлээх тэрээһиҥҥэ ыҥырабыт!

🕥 10:30 ч
📍 Буолар сирэ: Киирии стела

Олохтоох көҕүлээһиннэри өйүүр бырагырааманан тутуллубут "Сүлэ нэһилиэгэ" киирии аартык үөрүүлээх арыллыытыгар.

🕦 11:30 ч
📍 Буолар сирэ: Кулууп таһыгар

"Моя Якутия в XXI веке" үтүө дьыала бырагырааматынан тутуллар Модульнай успуорт саала акылаата түһэр Алгыс сиэригэр-туомугар барыгытын ыҥырабыт, кэлэн кыттыыны ылыҥ, көрүҥ-истиҥ!

*Аҕам саастаахтар декадаларын чэрчитинэн ыытыллар тэрээһиннэр ПРОГРАММАЛАРА:*

🍁 *Алтынньы 2 күнэ*
_*"ААСПЫТЫ АХТЫҺАН" сынньалаҥ киэһэтэ.*_
Итии чэйдээх сандалы тула ааспыты ахтыһан, араас күрэхтэргэ кыттан, үҥкүүлээһин, ыллаан-туойан, оонньооҥ-сынньаныҥ диэн ыҥырабыт.
(Биир суол астаах, аһыыр иһиттээх)
🕒 _Саҕаланар: 15:00 ч._
📍 Буолар сирэ: _"Айыы Тайбыт" КК_

🍁 *Алтынньы 6 күнэ*
_*"Ииньэлик" маастар кылаас*_
(Клей пистолеттаах, тесьмалаах)
🕒 _Саҕаланар: 16:00 ч._
📍 Буолар сирэ: _"Айыы Тайбыт" КК_

🍁 *Алтынньы 7 күнэ*
Баттах кырыйыы өҥөтө босхо 65+
(Эрдэттэн суруйтараҕыт)
📍 Буолар сирэ: _"Айыы Тайбыт" КК_

🍁 *Алтынньы 8 күнэ*
_*"Харысхал" маастар кылаас*_
СВО-ҕа ыытарга харысхаллары оҥоруу
(Клей пистолеттаах, инньэлээх)
🕒 _Саҕаланар: 16:00 ч._
📍 _Буолар сирэ: "Айыы Тайбыт" КК_

Көхтөөх кыттыыны кэлэн ылыҥ! 🤝

Бүгүн, балаҕан ыйын 29 күнүгэр, «Айыы Тайбыт» КК сынньалаҥ пааркатын быйылгы уонна эһиилги көҕөрдүү үлэтин ыытыы тула кэпсэтии, ону тэҥэ быйылгы үлэ түмүгүн ырытыһыы буолан ааста.

Мунньахха Саргылаана Васильевна сибэккини хайдах череноктуур туһунан кэпсээтэ. Өссө ханнык сибэккилэри хайдах олордуохха сөбүн ырытыстыбыт.

Бүгүҥҥү көрсүһүү түмүгүнэн, ахсынньы ыйга марафон ыытыах буоллубут. Марафон чэрчитинэн тэрилтэнэн, түөлбэнэн, өҥнөрүнэн уонна сибэкки арааһынан тыырыахпыт диэн быһаардыбыт.

*Ньурба оройуонун «БАЙАР АС» бородууксуйата Дьокуускай куорат элбэх маҕаһыыннарыгар тахсар кыахтанна*

«БАЙАР АС» салайааччыта Надежда Геннадьевна Филиппова «АЛРОСА» торговай хампаанньаны кытта үлэлэспитэ ыраатта, кини оҥорон таһаарар бородууксуйатыгар бу иннинээҕи дуогабардарын өссө уһаттылар.

Ону сэргэ атыы ситимин кэҥэтэр үлэ салҕанар: –«Пятерочка» маҕаһыыннарын кытта дуогабар түһэрсии үлэтэ бара турар;
— «Туймарт» маҕаһыыннарын кытта эмиэ дуогабар түһэрсиитэ саҕаланна;
— Дьокуускайдааҕы килиэп кэмбинээтин 15 киоскаларыгар «БАЙАР АС» бородууксуйатын тутан атыылыыр туһунан бигэргэтиигэ бэрилиннэ.

«Туймарт» уонна «Пятерочка» уонтан тахса маҕаһыыннаахтар. Онон Ньурбабыт «БАЙАР АС» бородууксуйата Дьокуускай куорат элбэх маҕаһыыннарыгар атыыга тахсыа, куорат дьоно сибиэһэй олохтоох аһылыгынан хааччылыахтара.