ХАРБАЛААХХА «СПОРТ - ОЛОХ НУОРМАТА»

🌿Балаҕан ыйын 15 күнүгэр Харбалаахтааҕы үөрэхтээһин холбоһугар Арассыыйа Бэрэсидьиэнин гранын пуондатын өйөбүлүнэн «Хамсаныы - бу олох төрдө» бырайыак чэрчитинэн, оҕолорго аналлаах «Спорт - олох нуормата» диэн эстафета-күрэх ыытылынна.

Бу тэрээһини нэһилиэк «ТОС Теплица» түөлбэтэ быйыл кыайбыт грант бырайыагынан тэрийдэ. Тэрээһин оҕо этин-хаанын уһугуннарар сэрээккэттэн саҕаланна. 🏃Күрэхтэһиигэ 10-17 саастаах чэгиэн-чэбдик туруктаах оҕолор мустан, биэс халыҥ ааттаах хамаандаҕа арахсан, сэттэ көрүҥнээх илин-кэлин түсүһүүгэ күөн көрүстүлэр:

-Сүүрүү;
-Мээчиктээх сүүрүү;
-Үрүллүбүт шары иккилии буолан илдьии;
-Олорон эрэ мээчиги бэрсии;
-Кумааҕынан хаамыы;
-Ону таһынан, атын да хамсаныылаах көрүҥнэр.
Күрэскэ кыттыбыт оҕолор бары биир сомоҕо буолан, сымса туттуулаах, түргэн толкуйдаах уонна сүбэнэн үлэлээн күөн көрүстүлэр. Уопсайа 40 оҕо кытынна.
Тыҥааһыннаах киирсии түмүгүнэн кыайыылаахтар ааттаннылар:
 I миэстэ — «Хотойдор» хамаанда (хамандыыр Халыева Дайаана).
 II миэстэ — «Учурдар» хамаанда (хамандыыр Федоров Ренат).
 III миэстэ — «Мохсоҕоллор» хамаанда (хамандыыр Рахлеев Артем).
Кыттыбыт оҕо-аймахха барыларыгар Арассыыйа Бэрэсидьиэнин гранын пуондатыттан сэмэй бириистэр туттарылыннылар, оттон олохтоох дьаһалта минньигэс ас арааһынан күндүлээтэ. Бу күрэхтэһиигэ уопсайа 60 киһи кытынна. Көрөөччүлэр олус көхтөөхтөр, ис сүрэхтэриттэн хаһыытаан-ыһыытаан, ыалдьан, тэрээһини олус сэргэхситтилэр.

Түмүктээн эттэххэ, хамсаныы - оҕо эт-хаан, өй-санаа өттүнэн сайдыытыгар саамай тутаах төһүү күүс. Оҕо төһөнөн элбэхтик хамсанар-имсэнэр, соччонон доруобай, күүстээх-уохтаах уонна тобуллаҕас өйдөөх-санаалаах буола улаатар.

//Варианна Макарова, Харбалаахтааҕы үөрэхтээһин холбоһугун директоры иитэр үлэҕэ солбуйааччы.

@taattagazeta