🌸👵👴 Үөрэх декадата: Бэтэрээннэрбитигэр дириҥ сүгүрүйүү уонна «Үтүө санаа корзината»! 🎁✨

Үөрэх декадатын чэрчитинэн, И.В. Пухов аатынан Окоёмовка сүрүн оскуолатын коллективын аатыттан олохторун, сыраларын оҕону үөрэтиигэ-иитиигэ анаабыт оскуолабыт ытык бэтэрээн үлэһиттэригэр сэмэй бэлэхпитин — «Үтүө санаа корзинатын» үөрүүлээхтик туттардыбыт.
Биһиги бэтэрээннэрбит — оскуолабыт сүдү киэн туттуута, бигэ тирэҕэ, муударай сүбэһиттэрэ уонна эдэр көлүөнэҕэ сырдык холобур буолаллар. Кинилэр үөрбүт харахтарын, истиҥ махталларын көрөр, сүбэ-ама тылларын истэр — хас биирдиибитигэр ураты күндү уонна долгутуулаах түгэн буолла! 
Оскуолабыт бары үлэһиттэрин аатыттан күндү бэтэрээннэрбитигэр алгыс бастыҥын аныыбыт:
🔹 Чэгиэн-чэбдик туругу, уостубат күүһү-уоҕу;
🔹 Уһун дьоллоох олоҕу;
🔹 Дьиэ кэргэҥҥитигэр өрүү сылаас сыһыаны, оҕолоргут, сиэннэргит тапталларын үөрүүнү-көтүүнү!
Эһиги оскуолабыт туһугар анаабыт үтүө сыраҕыт, үлэҕит хаһан да умнуллубат! Махтанабыт, сүгүрүйэбит! 💐❤️