Бүгүн, балаҕан ыйын 30 күнүгэр, Чурапчы улууһун үөрэҕин тэрилтэлэрин иитиигэ улахан дьоһуннаах түһүлгэтэ тэрилиннэ. Бу күн дириэктэри иитэр үлэҕэ солбуйааччылар, педагог-организатордар, социальнай педагогтар уонна дириэктэр сүбэһиттэрэ — улуус оскуолаларын иитии штабтарын исписэлиистэрэ — түмсэн, кэлэр кэми кэрэһэлиир, саҥа үөрэх дьылын торумнуур сүбэ мунньахха муһуннулар. Уопсайа 43 педагог кыттыыны ылла.
Хомоҕой тыл-өс, өй-санаа атастаһыыта, инникини былааннааһын — бу күн сүрүн соруга. Иитии үлэтэ — бу оҕо кутун-сүрүн, өйүн-санаатын кэрэһитэ, кини бу олоххо бигэ тирэхтээх, киэҥ көҕүстээх киһи буолан тахсарыгар олук уурар улахан сорук. Онон бу мунньахха кэлбит хас биирдии педагог — улуус кэскилин уһансар, үүнэр ыччат дьылҕатын түстэһэр киһи.
Сүбэ мунньахха бу сылга туолуохтаах соруктар, саҥа сүүрээннэр, оҕону иитиигэ сонун ньымалар ырытылыннылар. Хас биирдии оскуола, хас биирдии кылаас — бу кыра нэһилиэк, кыра уопсастыба. Онно оҕо киһи быһыытынан сайдар, доҕордоһор, кыайар-хотор, сыыһа-халты туттар, онтон үөрэнэр. Иитии штабтарын үлэһиттэрэ бу маннык түһүлгэҕэ мустан, биир санааҕа кэлэн, сомоҕолоһон тахсаллара — бу улахан кыайыы.
Санаа атастаһыытын кэнниттэн, инники үлэ торума чопчуланна. Хас биирдии оскуолаҕа, хас биирдии кэлэктиипкэ бу саҥа үөрэх дьыла саҥа кыахтары, саҥа ситиһиилэри аҕаллын. Кэнчээри ыччаттарбыт үөрэх-билии киэҥ аартыгын хорсуннук дабайдыннар, үтүө майгылаах, дойдуларыгар бэриниилээх дьон буола улааттыннар. Иитии үлэһитин сүрүннээччи педагогтарбытыгар бука барыларыгар тулууру, өйү-санааны, айар кыаҕы, үтүө түмүктэри баҕарабыт!