Чурапчы улууһугар суолга куттал суох буолуутун хааччыйар үөрэх таһымын үрдэтэр куурус ситиһиилээхтик ыытылынна.

Балаҕан ыйын 24 күнүгэр С.А. Новгородов аатынан Чурапчы орто оскуолатын базатыгар Чурапчы улууһун үөрэҕин салалтатын сыллааҕы былаанынан, «Саха сирин кэнчээри ыччата» өрөспүүбүлүкэтээҕи тирэх киин, Саха сиринээҕи Ис дьыала министиэристибэтэ уонна Ф.И. Авдеева аатынан Оҕо айар дьоҕурун дыбарыаһын көҕүлээһиннэринэн тэриллибит анал куурус буолан ааста. Тэрээһиҥҥэ улуус үөрэҕин салаатын 135 үлэһитэ кыттыыны ылла.

Куурус сүрүн сыалынан үөрэх эйгэтин үлэһиттэрин профессиональнай компетенцияларын үрдэтии, суолга куттал суох буолуутун хааччыйыы боппуруостарыгар бэлэмнэрин күүһүрдүү буолла.

Үөрэҕи иилээн-саҕалаан ыытта «Саха сирин кэнчээри ыччата» өрөспүүбүлүкэтээҕи тирэх киин дойдуга бэриниилээх буолуу, краеведения, туризм салаатын салайааччыта Валентина Абдулзьяновна Фазульянова. Тэрээһин чэрчитинэн интэриэһинэй лекциялар ааҕылыннылар:

✅"Чугас сытар улуустартан кэлэр оҕолорго куорат суолларыгар сэрэхтээх буолуу үгэстэрин иҥэрии" тиэмэҕэ Арассыыйа Судаарыстыбаннай автоинспекциятын суолга куттал суох буолуутун пропагандалыыр бөлөх сүрүн инспектора Владилена Геннадьевна Охлопкова кэпсээтэ.
✅Чурапчы улууһугар Судаарыстыбаннай автоинспекция начальнига Павел Павлович Сибиряков Чурапчы улууһугар оҕо суол-тырааныспар быһылааныгар эчэйиитин профилактикалыыр үлэни тэрийии туһунан кэпсээтэ. ✅«Эдэр суол инспектора» («Юный инспектор движения») хамсааһын туһунан, оҕо суол-тырааныспар быһылааныгар эчэйиитин профилактикалыыр үлэни тэрийии, тирэх киин үлэтин туһунан Дьокуускай куорат 3 №-дээх оскуола дириэктэрэ Яна Евгеньевна Киуру, дириэктэри иитэр үлэҕэ солбуйааччы Винокуров Климент Семенович, педагог-психолог Повод Любовь Александровна билиһиннэрдилэр. Бу оскуола үөрэнээччилэрэ - «Эдэр суол инспектора» («Юный инспектор движения») хамсааһын хамаандата агитбиригээдэ композициятын көрдөрдүлэр.
✅Ону таһынан Дьокуускай куорат 3 нүөмэрдээх «Катюша» уһуйаан тирэх киин буолан туран, үлэтин, уопутун туһунан иитээччи Елена Петровна Габышева кэпсээтэ.
✅«Куттал суох буолуутун лабораторията» федеральнай бырайыак үлэтин Ф.И.Авдеева аатынан Оҕо айар дьоҕурун дыбарыаһын педагога Сетынь Сергей Вильевич билиһиннэрдэ.
✅Суол саахалыгар эчэйбиттэргэ бастакы көмө оҥоруу туһунан Саха сиринээҕи Ис дьыала министиэристибэтин медико-санитарнай салаатын сиэстэрэтэ Яковлева Семира Семеновна сырдатта.

Үөрэх кэмигэр улууспутугар иккис сылын үлэлиир бырайыак чэрчитинэн "Хамсаныылаах дьарык" ыытылынна. Үөрэх бүтүүтэ стратегическай сессия ыытылынна, манна кыттааччылар 20 сылынан суол-иис сайдыытын торумнаатылар, бөлөхтөрүнэн үлэлээтилэр.

Тэрээһин чэрчитинэн куурус кыттааччылара Арассоыыйа Бэдэрээссийэтин Геройа Филипп Александрович Евсеевы кытта көрүстүлэр.
Бу курдук, былааннаммыт барыта кэмигэр, толору ситиһиилээхтик ыытылынна.