Санньыйбыт санааны
Сай ыраах үүрэҕин,
Ааспыты, буолары, кэлэри
Бу баардыы көрдөрөн,
Бар дьоҥҥун абылаан,
Олоххо уһуйар, үөрэтэр
Оһуобай талааннаах күүстээххин.

Алаһа дьиэҕин хаалларан
Ыраах да, чугас да сирдэргэ,
Аан дойду аартыгар
Айаҥҥа турунар күннээххин.
Айан да араастаах, эндирдээх,-
Атаара хаалаллар дьонноруҥ.
Сотору күүтэллэр, суохтууллар,
Күн уһуур-сыл тэҥэ.

Мин бүгүн кулуупка
Артыыһым концерын көрөммүн,
Алыһын сынньанан уоскуйдум.
"Аны да кэлээриҥ!"- дии санаан,
Айаҥҥа үтүөнү баҕара
Айхаллыы-уруйдуу атаардым.

Артыыспыт олоҕо хайдаҕын
Барытын биһиги билбэппит,
Кини да дьэ киһи-
Ардыгар санньыарар күннэрдээх,
Ардыгар аатырар-суолурар,
Хайдаҕын да иһин
Дьулуурдаах-мөккүөрдээх
Биһиги артыыспыт.

АННА МАКАРОВА, Мэҥэ-Хаҥалас, Павловскай, балаҕан ыйын 9 күнэ, 1993 сыл

***
Аатырбыт Алексей Прокопьевичка уонна Матрена Степановнаҕа дьолу-соргуну баҕарабыт!

Айыы сирин киһитэ,
Айыы сиэрин эн тутус-
Үчүгэйи үксэтэ
Үтүөҕэ эрэ дьулус!

Мин алгыһым сүрэххэр
Мэлдьи чугас сылдьыахтын,
Эрэй буулуур кэмигэр
Эрэл кыымын саҕыахтын!

Саха народнай поэта СЕМЕН РУФОВ, Дьокуускай куорат, кулун тутар, 1999 сыл

***
АЛЕКСЕЙ ПАВЛОВКА

Хас да киэһэ хатылаан
Таттаамы сөбүлээн көрдүбүт.
Аймаҕын ирдэһэр уоламмыт
Булугас мэйиитин сөхтүбүт.
Өлөксөйбүт салгыы айыаҕа,
Отелло оруолун оонньуоҕа.
"Бахчисарай фонтаныгар"
Уордаах Гирей буолуоҕа!

БАҺЫЛАЙ БЫРАЛГЫ, Кыым.- 2007.- Ахсынньы 27 күнэ

***
НОРУОТ АРТЫЫҺА АЛЕКСЕЙ ПАВЛОВКА

Сүргэни көнньүөрдэ,
Санааны көччүтэ,
Сүрэҕи манньыта
Сыанаҕа таҕыста
Көр-күлүү хоруола
Өлөксөй Баабылап.
Чох харах уоттанан,
Дьээбэрэ имнэннэ,
Халыҥ хаас хамсанан,
Хаадьыны хоҥнордо,
Үөннээх уос өһүллэн
Наара суох күллэрдэ.
Көрүдьүөс кутаата
Кытыаста умайда,
Көр-күлүү ардаҕа
Куппутун сайҕаата,
Күппүлүү күллүбүт,
Быара суох бардыбыт...
Сахалар киэн туттар
Биир мааны киһибит,
Норуоту аатырдар
Тапталлаах артыыспыт,
Күннэтэ туругур,
Кэрэни айа тур!

ВАЛЕНТИНА КОМИССАРОВА- КҮЛҮМҮРЭ, 15.08.2022 сыл

Пресс-центр ТЮЗа 2026