Көмүс күһүн!
Көмнөх түстэ,
Сэбирдэх саһарда,
Тымныы аҥаардаах сылаас тыал-суугунуур.

Үчүгэй да күн буолла!
Алтынньылыыр ый бастакы күнэ.
Бүлүү улууһа. Күүлэт нэһилиэгэ.
Саха ыалыгар уол оҕо күн сирин көрдө.
Өлөксөй диэн сүрэхтэннэ.
Оҕо -оҕо курдук ытаан, ньырыыскайдаммыт күннэрэ аастылар.
Сүүрэр-көтөр, мэниктиир,
Саҥаран- чуопчаарар кэмин аһарда.
Дьааһылкаҕа барда, оскуолаҕа үөрэннэ.
Уол оҕо-орой мэник буолан ылла.
Сайынын тыаҕа, окко-маска сырытта.
Күһүнүн -сааһын бултаата.
Сааланна-саадахтанна, арагаайкаланна даҕаны.
Кыһынын мас мастаата,
Хаары кытта туһунна
Оскуолатыгар хоочугураата.
Уон сыл оннук сырытта!
Уол улаатта, оскуоланы бүтэрдэ.
Ийэлээх, аҕатыттан Алгыс ылла.
Дойдутуттан арахта,
Киэҥ сири булла.
Үөрэҕи баһылаата.
Кэргэн ылла.
Оҕо төрөттө.
Биллиилээх Артыыс буолла.
Аар-саарга аатырда.
Өрөспүүбүлүкэҕэ- тыйаатыр тэрийдэ!
Үлэ күөстүү оргуйда,
Кэлии-барыы буолла,
Айан суола дыргыйда.
Көтөр- аалынан кый ыраахха көттө,
Ытыс хабыллар тыаһа-
Сыанаҕа ньиригийэ турда!
Ол курдук -араас сүдү айымньылар,
Арыаллыыр буоллулар кинини.
Арассыыйаны уҥуордаан,
Тас дойдулар кытары билиннилэр.
Оннук Күн бүгүнүгэр дылы -
Үлэтэ күөстүү оргуйар!

Аныгылыы албастаах сахха,
Айхалы тардыһан,
Алҕаатахпыт буоллун -сатабыллаах
Салайааччыбытын,
Субу кубулҕаттаах күҥҥэ
Уруйу тосхойон,
Туойдахпыт буоллун,
Өлөксөй Борокуоппуйабыска!!!
Түскэ сүбэлиибит,
Томторго соргулуубут,
Нуучча ньургуһунун кытта,
Туруулаһар -доҕор буол!
Саха талыылааҕын кытта -
Самсайдаһар Атас буол!
Омук одуруннааҕыттан
Охтон биэримэ,
Татаар тыллаахха
таба ньаҥсатыма,
Иэримэ көмүс дьиэни,
Иилээн-саҕалаан биэр.
Күүстээх үрэх күрүлгэнин курдук,
Күдэн баайдан,
Халаан уутун курдук
Халыан харчылан.
Үрэх -үрэх баһын
Үмүрүтэ тардар,
Үлүскэннээх үптэн,
Тайҕа-тайҕа баһын,
Таарыйталаан ааһар талааннаах сырыылан,
Үс дойду
Өйүн түмэн
Өрөгөйүн үрдэт.
Дом!Дом!Дом!
Алексей Прокопьевичка уонна Үүнэр көлүөнэ тыйаатырыгар,
Уруй! Айхал !

#АлексейПавлов #ДеньрождениеглавногочеловекаТЮЗ #ДеньрождениеАлексеяПавлова
#ТеатрюногозрителяЯкутииРСЯ