Буыннан буынга асыл хәзинә итеп тапшырыла торган, заман җилләре дә ала алмаган, кешелек тарихы өчен бик кадерле булган кыйммәтләр бар. Шуларның иң әһәмиятлесе әдәби хәзинә дип атала. Әлеге хәзинәне, үз иҗатларын башкаларга бүләк иткән, мәңгелек мирас итеп калдырган, Актанышта яшәп иҗат итүче шагыйрьләребез бүген мәктәбебезгә кунакка килде. Алар "Агыйдел дулкыннары" иҗат берләшмәсе әгъзалары: Лилия Гыйлем, Әлфисә Гыймазова, Фәймә Зәйнуллина, Алсу Галиева.
Өлкәннәр ункөнлеге уңаеннан үткәрелгән әлеге очрашуда язучыларның чыгышлары, киңәшләре тыңланды, шигырьләре укылды, укучыларны кызыксындырган сорауларга җаваплар алынды, күңелле җырлар, дәртле биюләр башкарылды, иҗат күргәзмәсе эшләде.
Ә икенче бүлектә исә кунакларыбыз классларда осталык дәресләре үткәреп, балалар күңелендә соклану, иҗатка, әдәбиятка мәхәббәт уяттылар.
Гомумән, кичә бик тәэсирле, эчтәлекле, кызыклы һәм файдалы булды. Милләтебезне саклауга керткән өлешләре өчен һәм безнең укучыларыбызны ихтирам итеп, вакыт табып килгән язучыларыбызга зур рәхмәтебезне җиткерәбез. Иҗат уңышлары телибез! Сау-сәламәт булыгыз! Сез – үз телебезгә, милләтебезгә гашыйк һәм йөрәгегездә халкыбызның көч-куәтенә, батырлыгына, аның якты киләчәгенә ныклы ышаныч йөртүчеләр. Киләчәктә дә очрашулар насыйп булсын!
Ә безнең күңелләрдә бүген туган якты хисләр озак сакланыр, очрашу җылылыгы киләчәктә гел рухландырып торыр.