Гуманитар ушэтынхэмкIэ адыгэ республикэ институтэу КIэрэщэ Тембот ыцIэкIэ щытым академикэу, филологие шIэныгъэхэмкIэ докторэу, Адыгэ Республикэм изаслуженнэ IофышIэшхоу, IорIотэшIэныгъэлэжьэу Хъут Щамсэдинэ къызыхъугъэр илъэс 90-рэ зэрэхъугъэм  фэгъэхьыгъэ шъолъыр шIэныгъэ-гъэфедэ конференциеу «Адыгэ IорIуатэр: уахътэм къыгъэуцурэ упчIэхэр» зыфиIорэр   непэ ригъэкIокIыгъ. Ащ еблэгъагъэх шIэныгъэлэжьхэр, тхакIохэр, къэбарлъыгъэIэс амалхэм яIофышIэхэр, Урысые Федерацием изаслуженнэ артистэу, Адыгэ Республикэм инароднэ артистэу, Адыгэ Республикэм илъэпкъ театрэу Цэй Ибрахьимэ ыцIэкIэ щытым иактрисэу Уджыхъу Марет, студентхэр.
 
 Iофтхьабзэр къызэIуихыгъ ыкIи зэрищагъ филологие шIэныгъэхэмкIэ докторэу, ГУАРИм иIэшъхьэтет шIэныгъэмкIэ игуадзэу Биданэкъо Марзет.
Зэрэугъоигъэхэм Хъут Щамсэдинэ ищыIэныгъэ гъогурэ иIофшIагъэхэмрэ агу къагъэкIыжьыгъ, IорыIотэшIэныгъэм непэ ыпашъхьэ къитэджэрэ упчIэхэм атегущыIагъэх.
 Сурэттехыгъэ дахэкIэ Iофтхьабзэр ухыгъэ хъугъэ.