Арассыыйа үтүөлээх образцовай «Кэнчээри» норуот ансамбыла VIII бүтүн дойдутааҕы «Поют дети России» хор бэстибээлин түмүктүүр киэһэтигэр, Кострома куоракка Гала кэнсиэргэ саха култууратын көрдөрөн, Оһуохай киирии чааһын толордо. Оҕолор хомустаан, кылыһахтаан ыллатан Арассыыйа култууратын устуоруйатыгар хаһан да буолбатах кэрэ уонна ураты түгэни бэлэхтээтилэр. Таһаарааччы Сардаана Дьяконова,хомусчут Эллина Цой,кынат кыргыттар Вика Терехова ,Дамира Дорофеева,Амелия Филиппова.

Бэстибээл түмүктүүр түһүмэҕэр 15 хор кэлэктиибэ, 400 оҕо кыттыбыт. Манна биһиги ансаамбылбыт Уһук Илин уокуругун чиэһин көмүскээтэ. Бэлиэтээн эттэххэ, «Кэнчээри» ансаамбыл 1972 сыллаахха Васлий Степанович Парников көҕүлээһининэн Уус Алдан улууһун Мүрү аҕыс кылаастаах оскуолатын иһинэн тэриллибитэ. Оччолорго Саха сиригэр бастакы академическай хор кэлэктиибэ буолбута. Билигин В.С. Парников аатынан «Кэнчээри» эстетическэй киин иһинэн үлэлиир.

Бу кыттыынан ансаамбыл «Норуот үгэстэрин харыстааһын иһин» диэн дипломунан наҕараадаланыллар. Күндү оҕолорбутугар, уһуйааччыларыгар инникитин өссө үрдүк ситиһиилэри, дабайыылары баҕарабын. Саха Өрөспүүбүлүкэтигэр биллэриллибит Култуура сылыгар оҕолорбут ситиһиилэрэ өссө биир чаҕылхай түгэнинэн буолла.

Афанасий Ноев