🏛️Бэс ыйын 17 күнүгэр төрөөбүт тылбытынан тахсар «Чолбон» уус-уран литэрэтиирэ сурунаала төрүттэммитэ 100 сылын бэлиэтиир "Суһумнуур сулустуу сирдиир сурунаал» тэрээһин Василий Андреевич Протодьяконов- Кулантай аатынан литературнай түмэлгэ үрдүк таһымҥа буолан ааста.

Тэрээһин улуустааҕы культура салаатын начальнигын солбуйааччы Сулустаан Новоприезжай, улуус түмэлин директора Оксана Прядезникова, «Чолбон» сурунаал бас эрэдээктэрэ Гаврил Андросов, «Уһуктуу» суруйааччылар түмсүүлэрин салайааччыта Галина Аммосова эҕэрдэ тылларыттан саҕаланна.
“Чолбон” сурунаал үбүлүөйдээх күнүгэр аналлаах быыстапканы Кулантай аатынан литературнай түмэл сэбиэдиссэйин солбуйааччы Диана Бурцева сырдатта. 1926 сылтан саҕалаан тахсыбыт «Чолбон» сурунаал 700-тэн тахса нүөмэрэ саха сиригэр биир соҕотох толору коллекцията Кулантай түмэлин фондатыгар хараллан сытар, ону бу күн дьон көрүүтүгэр быыстапкаҕа туруордулар.
 
Сурунаал бас эрэдээктэрэ Гаврил Андросов салайааччылаах «Чолбон» сурунаал үлэһиттэрэ Данил Макеев, Туяра Павлова, Рустам Каженкин кэлбит ыалдьыттарга анаан хоһоон, кэпсээн суруйуутугар маастар-кылаастары ыыттылар. 
Эбиэт кэннэ хамаанданан арахсан  "Чолбон  өй күрэһэ" оонньуу буолла. Күрэскэ Уус Алдан улууһун С.С. Васильев-Борогонскай аатынан киин библиотека коллективын "Дьулуур", ⁠Кэптэниттэн  "Ааҕар Лөгөй",  ⁠Мүрү саһарҕата редакцияттан "Саһарҕалар», ⁠Чараҥтан "Сайдыс", Мүрү нэһилиэгиттэн "Ийэ тыл ситимэ", Майаҕастан "Хоһуун Хоролор", ⁠Тулунаттан "Ил" хамаандалар кытыннылар.

🏆Кыттааччылар 3 түһүмэҕи ааһан  бэйэлэрин билиилэрин тургуттулар.
Түмүккэ🥇миэстэни -   "Ааҕар Лөгөй",🥈миэстэни - “Ийэ тыл ситимэ»,🥉миэстэни - “Ил” хамаанда ыллылар итиэннэ анал бирииһинэн  «Дьулуур» хамаанда наҕараадаланна.

Улуустааҕы историяны, кыраайы үөрэтэр музей

📲Мах-каналбытыгар сурут
⬇️
https://max.ru/join/3C9ZQLhT3NOAcTqvoqV7q1JihA40sSL8ZGoFY5jwqMU

🌐мюрюгазета.рф

✅ @uamurusahargata @ulusmedia