Нæ Иры номхæссæн чызджытæ,
Нæ царды базырджын бæллицтæ!
Налхъуыт, налмасæй конд фæрдгуытæ,
Уæ рынтæ бахæрон, уæ низтæ.
 
Уæ фæкаст – хъавæгау рæстдзæвин,
Зынг фатау зæрдæйыл æмбæлы...
Уæ уарзт æнæлаз 'мæ æнæхин,
Нæ цуды уд-зынты, нæ кæлы...
 
Уæ фæхудт, уе сныхас – поэзи,
Цæхæр арт лæппутыл æндзары...
Зæххыл бæллиццагæй цы фенди,
Уæ удты бацарди, уæ тары...
 
Уæ хъазт, уæ фæндыры æрцагъдмæ
Нызмæлы айнæг дæр, нырризы...
Уæ фидыц, уе 'гъдау 'мæ уæ уарзтмæ
Уæларвæй Хуры фырт æрхизы...
 
Уæд ахуыр, куысты, зæгъ, – хъазуатон,
Уæ ном Ирыстоныл ныхъхъæр и...
Уæллæй, тæхудиаг – йæ хъал бон,
Сымахæй къайы бар кæмæн и!..
 
Нæ Иры номхæссæн чызджытæ,
Дæттæй, уæ зæрдæ уын куы ссарин, –
Поэты базырджын хъуыдытæ
Уæ номыл барджынæй фæзарин...