💥Кожууннардан медээлер
📢Бодан, шиитпирле, тииле!
Өвүр кожууннуң Солчур ортумак школазында Уругларның бот-идепкей төвүнде школачыларның күскү дыштанылгазы чүгле хөглүг эвес, ажыктыг база эртип турар. Дыштанылганың беш дугаар хүнү «Бодан, шиитпирле, тииле!» деп кыйгырыг-биле эрткен.
Бот-идепкей төвүнде дыштанып турар уруглар угаан оюннары — кроссвордтар болгаш шарадалар тыварынга киришкеннер. Чалыы угаанныгбайлар өөредиглиг айтырыгларга харыылап, школа программазындан барымдааларны сактып тургаш, угаанын тренировкалатканнар. Ол анаа-ла маргылдаа-оюн эвес, а ёзулуг сонуургак чоруктуң байырлалы болган.
Эң-не идепкейлиг киржикчилерни Өвүрнүң хоочуннары-биле ужуражыр өөредилгелиг экскурсия манап турган. Хандагайтының Социал фондузунуң баазазында Улуг салгал-биле харылзаа тудар төпке аныяк салгал биле хоочуннар аразынга солун ужуражылга болган. Аяк шай ишпишаан, национал тыва оюннарны ойнааннар. Дуржулгалыг хоочуннар «Кажык» оюнну чалыы өөрлеринге өөреткен. Ол ышкаш шашкиге база мөөрейлешкеннер.
Шак-ла мындыг өөредиглиг хемчеглер салгалдарны демнештирип, каттыштырар деп түңнээннер.
📢Малчыннарга эдискилерни үлээн
Барыын-Хемчик кожууннуң чагыргазы адыглар хоюзар 50 эдискини саткаш, малчыннарга үлээн. Ол дээрге араатан амытан — адыгларның чурттакчылыг черлерже кирери көвүдээнинден малчыннарны камгалаар сорулгалыг профилактиктиг хемчег-дир.
Аңныыр инспектору Шолбан Сыдам-оол Аяңгаты сумузунуң чагырыкчызы С.Б. Ооржак база Барыын-Хемчик кожууннуң көдээ ажыл-агый эргелелиниң даргазы А.А. Дүмен-Байыр-биле кады малчын аалдарже үнүүшкүннү кылган. Специалистер малчыннарга деткимчени көргүзүп, шимээн-дааш үндүрер эдискилерни дамчыткан.
📢Өөредиглиг кичээлдер
Каа-Хем кожууннуң төвү Сарыг-Септе С.О. Тамба аттыг төп ном саңынга орук шимчээшкининиң айыыл чок чоруунче угландырган профилактиктиг хемчег болган. Аңаа школачыларга КАИ ажылдакчылары өөредиглиг кичээлди эрттирген. Уруглар орук шимчээшкинин айыыл чок болдуруп турар мергежил-биле чоок таныжар аргалыг болганнар. Ол ышкаш видео дамчыштыр орук шимчээшкининиң дүрүмнерин база шиңгээдип алганнар.
Уруглар кудумчуже үнгеш, инспекторларның ажылын хайгаарап көргеннер. Олар чолаачылар болгаш чадаг кижилерден орук шимчээшкининиң дүрүмнериниң дугайында айтырыгларны салган.
Мындыг өөредиглиг ужуражылгалар уругларның келир үеде мергежилин шилип алырынга база аңгы-аңгы мергежилдерниң ажыктыын билип алырынга дузалаар.
А. СОЯН белеткээн.
Медээлерни болгаш чуруктарны кожууннарның соцчеткилерде арыннарындан алган.
“Шын” №43 2026 чылдың ноябрь 5
"Шын" солуннуң МАХ-каналынга каттыжыңар:
max.ru/channel_shyn