Толкъун къарсла – къараучуланы ыразылыкъларыны белгиси
Жаш адамланы бла сабийлени араларында башхача оюм эте билгенле, бир ишни тамамлауну жангы амалларын тапханла эмда жангычылыкъны терк окъуна жаратханла эмда алгъанла не заманда да къууандырадыла, ёхтемлендиредиле. Аллайланы бир къауумун «Хасания» стадионда хычиннге жораланнган байрамда да кёрдюк.
Аны къурагъанла Интернетде да сабийлени араларында конкурс бардыргъандыла. Анда биринчи жерге Долинскде генерал Зокаланы Валерийни атын жюрютген 8-чи номерли мектепде бешинчи классда окъугъан Холаланы Мариям тийишли болгъанды. Ол, эм иги белгилеге окъугъаны бла къалмай, гитчелигинден да гимнастикагъа жюрюгенди, Сотталаны Къаншауну атын жюрютген «Эльбрус» юлгюлю тепсеу ансамбльни солистиди, алтын халыла бла накъышла сала биледи, юй жумушлада анасына болушады. Интернетде видеоролигинде уа хычинлени кеси къалай жарашдырып салгъанын кёргюзтеди.
Экинчи жерге Элбрус элде Абайланы Солтанбек атлы мектепни онунчу классыны окъуучусу Хаджиланы Назиля чыкъгъанды. Ол 9-чу классны къызыл аттестатха бошагъанды, мектепни жамауат жашаууна тири къатышады, «Биринчилени атламлары» жамауат биригиуню бёлюмюне башчылыкъ этеди. Назмуланы бек сюеди, кеси да жазаргъа кюрешеди, Тырныауузда музыкалы школда миллет къобузну согъаргъа юйренеди, мектепни бошагъандан сора уа, юрист болургъа мураты барды. Аш этерге уа Мокъаланы Гульнара Элбрус районда бардыргъан «Мисс хозяюшка» деген конкурсда хорлагъанындан сора бютюн тартылып башлагъанды.
Ючюнчю сыйлы жер а Таймаскъулланы Алиягъа жетгенди. Ол Яникойда жашайды, Байсолтанланы Алимни атын жюрютген мектепни ючюнчю классыны окъуучусуду. Алия да, башында атлары айтылгъан къызчыкълача, тепсерге, китапла окъургъа сюеди. Биттирланы Азамат башчылыкъ этген «Амир» юлгюлю тепсеу ансамбль бла бирге республикалы, регион конкурслагъа да къатышып келеди. Мектепни бошагъандан сора уа, жашауун жыр бла байламлы этерге сюйюп, Искусстволаны Шимал-Кавказ институтуна кирир муратлыды.
Жыргъа, тепсеуге фахмусундан сора да, сурат ишлерге да хунери барды. Аны чыгъармаларын тюрлю-тюрлю сабий конкурслада кёрюрге боллукъду. Энди уа Москвада бардырыллыкъ «Талантливая Россия» битеуроссей фестивальгъа къатышыргъа да хазырлана турады. Мектепде иги окъугъаны, конкурслада хорламла болдургъаны ючюн а грамотала, дипломла бла да кёп кере саугъаланнганды. Дагъыда Алия, чынтты таулу къызчыкъча, ыннасындан эшиу эшерге юйреннгенди. Хычинни чемпионаты баргъан кюн а ол сахнада Созайланы Ахматны «Хычин» деген назмусун да кёлден айтханды.
Къызчыкъла барысы да дипломла, Къулийланы Къайсынны китаплары эмда ахча бла саугъаланнгандыла. Хычинлени Долинскде «Хасания» стадионда бардырылгъан чемпионатына сабийлени къатышханлары бютюн хычыуун кёрюннгенди. Алай бла ала миллет адет-тёрелеге, халкъларыны тарыхларына, маданиятларына дагъыда бир кере тюшюннгендиле.
Мариямны, Назиляны эмда Алияны атлары айтылгъанда, стадиондагъы халкъ алагъа толкъун къарсла бла тюбегенди.
Жаш адамланы бла сабийлени араларында башхача оюм эте билгенле, бир ишни тамамлауну жангы амалларын тапханла эмда жангычылыкъны терк окъуна жаратханла эмда алгъанла не заманда да къууандырадыла, ёхтемлендиредиле. Аллайланы бир къауумун «Хасания» стадионда хычиннге жораланнган байрамда да кёрдюк.
Аны къурагъанла Интернетде да сабийлени араларында конкурс бардыргъандыла. Анда биринчи жерге Долинскде генерал Зокаланы Валерийни атын жюрютген 8-чи номерли мектепде бешинчи классда окъугъан Холаланы Мариям тийишли болгъанды. Ол, эм иги белгилеге окъугъаны бла къалмай, гитчелигинден да гимнастикагъа жюрюгенди, Сотталаны Къаншауну атын жюрютген «Эльбрус» юлгюлю тепсеу ансамбльни солистиди, алтын халыла бла накъышла сала биледи, юй жумушлада анасына болушады. Интернетде видеоролигинде уа хычинлени кеси къалай жарашдырып салгъанын кёргюзтеди.
Экинчи жерге Элбрус элде Абайланы Солтанбек атлы мектепни онунчу классыны окъуучусу Хаджиланы Назиля чыкъгъанды. Ол 9-чу классны къызыл аттестатха бошагъанды, мектепни жамауат жашаууна тири къатышады, «Биринчилени атламлары» жамауат биригиуню бёлюмюне башчылыкъ этеди. Назмуланы бек сюеди, кеси да жазаргъа кюрешеди, Тырныауузда музыкалы школда миллет къобузну согъаргъа юйренеди, мектепни бошагъандан сора уа, юрист болургъа мураты барды. Аш этерге уа Мокъаланы Гульнара Элбрус районда бардыргъан «Мисс хозяюшка» деген конкурсда хорлагъанындан сора бютюн тартылып башлагъанды.
Ючюнчю сыйлы жер а Таймаскъулланы Алиягъа жетгенди. Ол Яникойда жашайды, Байсолтанланы Алимни атын жюрютген мектепни ючюнчю классыны окъуучусуду. Алия да, башында атлары айтылгъан къызчыкълача, тепсерге, китапла окъургъа сюеди. Биттирланы Азамат башчылыкъ этген «Амир» юлгюлю тепсеу ансамбль бла бирге республикалы, регион конкурслагъа да къатышып келеди. Мектепни бошагъандан сора уа, жашауун жыр бла байламлы этерге сюйюп, Искусстволаны Шимал-Кавказ институтуна кирир муратлыды.
Жыргъа, тепсеуге фахмусундан сора да, сурат ишлерге да хунери барды. Аны чыгъармаларын тюрлю-тюрлю сабий конкурслада кёрюрге боллукъду. Энди уа Москвада бардырыллыкъ «Талантливая Россия» битеуроссей фестивальгъа къатышыргъа да хазырлана турады. Мектепде иги окъугъаны, конкурслада хорламла болдургъаны ючюн а грамотала, дипломла бла да кёп кере саугъаланнганды. Дагъыда Алия, чынтты таулу къызчыкъча, ыннасындан эшиу эшерге юйреннгенди. Хычинни чемпионаты баргъан кюн а ол сахнада Созайланы Ахматны «Хычин» деген назмусун да кёлден айтханды.
Къызчыкъла барысы да дипломла, Къулийланы Къайсынны китаплары эмда ахча бла саугъаланнгандыла. Хычинлени Долинскде «Хасания» стадионда бардырылгъан чемпионатына сабийлени къатышханлары бютюн хычыуун кёрюннгенди. Алай бла ала миллет адет-тёрелеге, халкъларыны тарыхларына, маданиятларына дагъыда бир кере тюшюннгендиле.
Мариямны, Назиляны эмда Алияны атлары айтылгъанда, стадиондагъы халкъ алагъа толкъун къарсла бла тюбегенди.