БАГШНРТ ТАЛЬВХ ЙӨРӘЛ

"Хамг герл зулас,
Хамг эрдм багшас" гидг үлгүр бәәнә.
Нарт делкәд эрдмин герл цацрулсн,
Насни замиг олнд заасн,
Үснәс цаһан седклтә,
Суврһн мет ачта,
Олн баһчудыг һар-һараснь атхулсн,
Орчлңд кезә чигн салдго
Эрдмин җивр хәәрлсн
Эркн күндтә мана багшнр!

Сурһульчнринтн эрдм шар нарн мет мандлтха!
Сурһалтн Сүмр уул мет бат болтха!
Сурһультн Сүн дала мет өргн болтха!
Ут наста, бат кишгтә болҗ,
Оньдин дөрвн цагт менд амулң йовтн!
Билгин эзн баатр Маньҗушри,
Олн Деед бурхд таанриг евәтхә!

Хальмг кел өргҗлтин төвин көдләчнр