UUSALDAN.RU

Сэһэн Ардьакыап аатынан улуус историятын, кыраайы үөрэтэр түмэлэ «Дьиэ кэргэн» национальнай бырайыак чэрчитинэн «Техническое оснащение региональных и муниципальных музеев» диэн федеральнай субсидияны ылары ситистэ.

Барыта холбоон 5 мөлүйүөнтэн тахса солкуобай көрүлүннэ. Саха сириттэн бу куонкуруска кыайыылаах тахсыбыт 5 түмэлтэн биһиги улууспут түмэлэ саамай үрдүк үбүлээһини ылла.

Бу үп-харчы түмэлгэ аныгы технологиялары киллэрэргэ, дьон интэриэһин тардарга, ону тэҥэ пуонда үлэтин хаҥатарга төһүү күүс буолуоҕа.

Улуус дьаһалтатын пресс-сулууспата.

Ольга Кардашевская, "Күбэйэ" маҕаһыын бэрэстэбиитэлэ, Мэҥэ Хаҥалас

Марианна Мандарова, бэйэ дьарыктаах, Мындааба бөһүөлэгэ

Анастасия Семенова, Хомустаах бөһүөлэгэ

Мария Жиркова, бэйэ дьарыктаах

Варвара Бурцева, Мүрү нэһилиэгин олохтооҕо

Бүгүн, алтынньы 2 күнүгэр, Уус Алдан улууһун киинигэр Бороҕоҥҥо «Тыа сиригэр урбаан: билиҥҥи кэмҥэ сайдар кыахтара» диэн Илин Эҥэр улуустарын урбаанньыттарыгар бизнес-сессия ыытылынна.

Тэрээһини СӨ Предпринимательствоҕа, эргиэҥҥэ уонна туризмҥа министиэристибэтэ, «Мин урбааным» киин уонна Уус Алдан улууһун дьаһалтата тэрийдилэр.

Тэрээһин чэрчитинэн улуустартан кэлбит урбаанньыттар бэйэлэрин бородууксуйаларын, ураты оҥоһуктарын туруоран, дьон-сэргэ болҕомтотугар таһаардылар.

Ол курдук «Билиҥҥи кэмҥэ социальнай граннарга кыттан урбааҥҥа хайдах көмөлөһүөххэ сөбүй?» диэн үөрэх интенсивын «Грант-старт» НКО салайааччыта, СӨ ыччат бэлиитикэтин уонна гражданскай көҕүлээһиннэрин туйгуна Анисья Спиридонова ыытта.

Нолуок уонна отчуот эйгэтин биир бастыҥ эспиэрэ, «Статус+» Бухгалтерия киинин салайааччыта Айталина Иванова "Розничный бизнес 2026" диэн урбаанньыттарга анаан сэминээр оҥордо.

«Олохтоох бреннэри сайыннарыы» сиэксийэни СӨ Предпринимательствоҕа, эргиэҥҥэ уонна туризмҥа министиэристибэтин урбааны сайыннарар отделын салайааччыта Петр Никифоров ыытта. Манна биһиги улуустан бэйэ дьарыктаах Варвара Бурцева, урбаанньыи Сардана Портнягина, Мэҥэ Хаҥаластан "Күбэйэ" маҕаһыын бэрэстэбиитэлэ Ольга Кардашевская бэйэлэрийн продукцияларын кэпсээтилэр, көрдөрдэлэр.

"Урбаан сайдыытын сүрүн тирэҕэ — үп-харчы" сиэксийэҕэ тустаах тэрилтэлэр салайааччылара СӨ «Урбааны сайыннарар пуонда» генеральнай дириэктэрэ Петр Максимов, СӨ «Кээпэрэтиип мэктиэлээһин пуондата» дириэктэрэ Андрей Миронов, электроннай бүддьүөт исписэлииһэ Аркадий Ксенофонтов урбаанньыттарга субсидиялары уонна граннары электроннай бүддьүөккэ хайдах табыгастаахтык туһаналларыгар сүбэлэри биэрдилэр. Ону тэҥэ «Мин урбааным» киин «Честный знак» систиэмэтин туһунан сиһилии билиһиннэрдэ.

Бизнес-сессия кэмигэр урбаанньыттар күн бүгүҥҥү тыын кыһалҕаларын ырыттылар, уопут атастастылар.

Улуус дьаһалтатын пресс-сулууспата.

Быйылгы «Урожай» быыстапка-дьаарбаҥка көхтөөхтүк уонна бэрт сэргэхтик барда. "Бэйэтэ бырааһынньык курдук ааста" диэн элбэх киһи бэлиэтээтэ.

Дьаарбаҥкаҕа улуус бөдөҥ хаһаайыстыбалара, агро оскуолалар, биирдиилээн дьон кыттан, бэйэлэрин бородууксуйаларын аҕалан ас-үөл эгэлгэтин тартылар.

Дьаарбаҥкаҕа ордук "Биэттэ-Агро" бэйэтин бурдугун, онтон оҥорон таһаарбыт килиэптэрин, бурдук астарын дьон сэргээтилэр, сиэмэнэн кытта атыыластылар.

Владислав Мордовской уонна Владимир Барашков хаһаайыстыбаларын хаппыысталарын уонна хортуопуйдарын киилэтин 80 солкуобайга дьон үөрэ-көтө атыыласта.

"Мүрү Ас" уонна "Туйма" хаһаайыстыбалара арыыны тэттик гына дьааһыктаан уонна быһан атыылаабыттара дьон ыларыгар табыгастаах буолла.

Маны таһынан үрүҥ астан бородууксуйа арааһа, убаһа, сүөһү этэ, дьон бэйэтэ оҥорбут заготовката, бэйэ мүөтэ уо.д.а. эгэлгэ ас арааһа атыыланна.

Тэрээһин үөрүүлээх чааһыгар улуус баһылыга Василий Алексеев кыттыыны ылан, мустубут дьону эҕэрдэлээтэ. Тыа хаһаайыстыбатын эйгэтигэр быйылгы ситиһиилэртэн киэн туттарын, тыа сирин үлэһит дьонун сыралаах үлэтэ үрдүктүк сыаналарын бэлиэтээтэ уонна инникитин даҕаны бу курдук өлгөм үүнүүлээх буолан, нэһилиэнньэни бэйэ хаачыстыбалаах аһынан хааччыйа туралларыгар баҕа санаатын тиэртэ.

Дьаарбаҥка түмүгүнэн "Хортуопуйу, оҕуруот аһын уонна туораахтаах култуураны дэлэтээччилэр"

1 миэстэ “Биэттэ-Агро” ХЭТ (Баатаҕай нэһилиэгэ)

2 миэстэ Владислав Мордовской (Суотту нэһилиэгэ)

3 миэстэ Иван Барашков (Бороҕон нэһилиэгэ)  

Оҕуруот аһын, туораахтаах култуураны уонна кэнсиэрбэлэммит хаһааһы хамаҕатык атыылаабыт кэтэх хаһаайыстыбалаахтарга:

1 миэстэ Тамара Тарабукина (II Байаҕантай нэһилиэгэ)

2 миэстэ Ирина Дьяконова (Мүрү нэһилиэгэ, Мындааба)

3 миэстэ Гаврил Сергеев (II Лөгөй нэһилиэгэ)

Агро хайысхалаах оскуолалар уонна тэрилтэлэр ортолоругар:

1 миэстэ Мүрүтээҕи “Эдэр натуралистар    
ыстаансыйалара” (директор Таисия Шамаева)

2 миэстэ Суоттутааҕы агро-оскуолата (директор Егор Филиппов)

3 миэстэ “555” бэкээринэ (салайааччы Сардаана Портнягина).

Бу курдук, «Урожай» быыстапка-дьаарбаҥка тыа сирин уйгутун, үлэһит дьонун түмэр, сомоҕолуур биир улахан тэрээһининэн буолла, сотору кэминэн "Идэһэ" дьаарбаҥкатыгар мустуохтара.

Улуус дьаһалтатын пресс-сулууспата.

Күндү Уус Алдан улууһун ытык-мааны аҕам саастаах олохтоохторо, үлэ уонна тыыл бэтэрээннэрэ!

Уус-Алданнааҕы социальнай көмүскэл кэлим киинин аатыттан эһигини Аҕам саастаахтар аан дойдутааҕы күннэринэн ис сүрэхтэн эрэллээхтик эҕэрдэлиибин!

Бу бэлиэ күн - эһиги тускутугар, улуус уонна өрөспүүбүлүкэ сайдыытыгар киллэрбит сүүнэ кылааккытыгар, сыралаах үлэҕитигэр уонна муударай сүбэҕитигэр муҥура суох махталбытын биллэрэр кэрэ түгэммит буолар. Эһиги олоххо тардыһыыгыт, ыарахаттары туоруур тулуургут уонна хорсун быһыыгыт — эдэр көлүөнэҕэ өрүү үрдүк холобур, күүс-көмө уонна эрэл буолар.

Биһиги, социальнай сулууспа үлэһиттэрэ, эһиги олоххут таһыма тупсарын, уйгулаах буоларын туһугар өрүү күүс-көмө буоларга, хас биирдиигитигэр кыһамньыны уонна сылаас сыһыаны аныырга бэлэммит.

Бу үөрүүлээх күн эһиэхэ уонна эһиги чугас дьоҥҥутугар баҕарабын кытаанах доруобуйаны уонна уһун үйэлээх буолууну,дьиэ-кэргэҥҥитигэр сылаас, ил-эйэ уонна өйдөһүү өрүү олохсуйарын,оҕолоргут, сиэннэргит ситиһиилэринэн куруук үөрэ-көтө сылдьаргытыгар.

Ытыктабылы кытта, Уус-Алдан улууһун социальнай көмүскэл кэлим киинин салайааччыта Иннокентий Сергеев.

Убаастабыллаах аҕам саастаах дьоммут!

Эһигини Уус Алдан улууһун дьаһалтатын, улуус мунньаҕын депутаттарын Сэбиэтин уонна тус бэйэм ааппыттан аҕам саастаахтар аан дойдутааҕы күннэринэн итиитик-истиҥник эҕэрдэлиибит!

Бу ураты суолталаах күн биһиги аҕам саастаах дьоммутугар төрөөбүт дойдугут сайдыытыгар сүҥкэн кылааккыт, албан ааттаах бэриниилээх үлэҕит, эстибэт эрчимҥит иһин истиҥ махтал тылларын этэбит. Кырдьаҕастар аан дойдутааҕы күннэрэ ытыктабыл уонна үгэс эрэ быһыытынан бэлиэтээһин буолбакка, аҕа көлүөнэ дьоммутугар күннэтэ ахсаабат болҕомто уурарбытын санатар ытык күн буолар.

Аҕам саастаах дьону ытыктааһын, өрө тутуу биһиэхэ былыр былыргыттан баар үгэс. Кинилэр олохторо тупсарын хааччыйыы улууспут социальнай политикатын биир сүрүн хайысхата буолар.

Күндү бэтэрээннэр!

Эһиги үлэҕэ сыһыаҥҥыт, олоххо баай көрүүгүт, уопуккут, санааҕыт күүһэ биһиэхэ куруук холобур буолар. Бука барыгытыгар чэгиэн доруобуйаны, дьоллоох олоҕу баҕарабыт!

Уус Алдан улууһун баһылыга Василий Алексеев.

Балаҕан ыйын 25 күнүгэр Саха сирин биир улахан эбэтин - Алдан Эбэ күнэ бэлиэтэнэр.

Бу күнү көрсө Өспөх нэһилиэгэр «Биир ньыгыл Арассыыйа» баартыйа олохтоох салаатын көҕүлээһининэн дойду үрдүнэн ыытыллар «Вода России» экологическай хамсааһын чэрчитинэн, олохтоохтор субуотунньукка көхтөөхтүк таҕыстылар.

Маҥнай 15:00 чаастан Өспөх орто оскуолатын үөрэнээччилэрэ уонна төрөппүттэр Кыайыы болуоссатыгар мас олортулар.

Мас олордуутун кэнниттэн, нэһилиэк дьоно-сэргэтэ Алдан өрүс биэрэгин ыраастааһыҥҥа туруннулар.

Нэһилиэк олохтоохторо бу курдук сомоҕолоһон, биир сыалга турунан үлэлээбиттэриттэн үөрэллэр. Маннык тэрээһиннэр нэһилиэккэ ыраас эйгэни олохтуурга, уопсай дьыалаҕа эппиэтинэстээх буоларга уонна көлүөнэлэр ситимнэрин бөҕөргөтөргө төһүү күүс буолаллар.

Улуус дьаһалтатын пресс-сулууспата.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ Саха сирин үрдүнэн тыатааҕы ахсаанын сүрүннээһин уонна кэтээн көрүү билиҥҥи туругун туһунан иһитиннэрэр. Бу кэлиҥҥи кэмнэргэ адьырҕа кыыл дьонноох сиргэ киириитэ элбээбитинэн, ыксаллаах быһыыны-майгыны сэрэтэр уонна нэһилиэнньэ куттала суох буолуутун хааччыйар сыалтан, балаһыанньаны суһаллык хонтуруолга тутарга туһаайар.

Бүгүн улуус дьаһалтатыгар нэһилиэнньэлээх пууннарга адьырҕа кыыллар киирэр түбэлтэлэригэр олохтоохторго куттал суоһуурун туоратарга үлэни ыытар сыаллаах мунньах ыытылынна. Манна сүрүннээн тыатааҕыны бултааһын быраабылалара уонна болдьохторо, адьырҕа кыыл сүөһүнү, сылгыны тардар түбэлтэтигэр өлүктэри харайыы, ыраастааһын ирдэбиллэрэ, бултааһыҥҥа бэриллэр көҥүл (лицензия) ахсаана, булт сааларын харайыыга, илдьэ сылдьыыга сокуоҥҥа киирбит уларыйыылар тула кэпсэттилэр.

Мунньахха нэһилиэк баһылыктара көхтөөх кыттыыны ылан, элбэх боппуруоһу көтөхтүлэр, санааларын аһаҕастык үллэстэн, суолталаах быһаарыылары ылыннылар.

Инникитин маннык көрсүһүүлэри кэмиттэн кэмигэр ыытарга, нэһилиэнньэ куттала суох буолуутугар хонтуруолу күүһүрдэргэ уонна сэрэтэр-өйдөтөр үлэни ыытарга биир санааҕа кэллилэр. Бу үлэҕэ олохтоохтору кытта быһаччы сибээһи тутуһуу, иһитиннэриини кэмигэр тиэрдиигэ бииргэ үлэлэһии соруктара турдулар.

Улуус дьаһалтатын пресс-сулууспата.

Дойдубут экологиятын харыстыыр сыаллаах «Вода России» диэн улахан хамсааһын чэрчитинэн, II-с Байаҕантай нэһилиэгин олохтоохторо бөһүөлэк таһынааҕы үрэх кытыытын ыраастаатылар. Субуотунньукка олохтоохтор көхтөөхтүк кытыннылар.

Манна даҕатан эттэххэ, саас Бороҕоҥҥо олорор биир дойдулаахтара тахсан олохтоохтору кытта холбоһон, 50-чэ буолан бөһүөлэк таһынааҕы алааһы ыраастаабыттара.

Маннык түмсүүлээх үлэ - төрөөбүт дойдуга таптал, киниэхэ харыстабыллаах сыһыан туоһута буолар.

Айылҕабытын харыстыаҕыҥ, ыраастыы сылдьыаҕыҥ!

Улуус дьаһалтатын пресс-сулууспата.

📣 Уважаемые участники подпрограммы «Обеспечение жильем молодых семей»!

В целях направления заявки в федеральную программу для актуализации Ваших учетных данных просим сообщить об изменениях, если таковые существуют, а именно изменение состава семьи, адреса проживания,перемена имени, фамилии, приобретения жилья и т.д.

Для сверки просим подойди с сопутствующими измененными документами (заверенные установленными законодательством РФ порядком) в администрацию района по адресу: с. Борогонцы, ул. Ленина, 31, каб. 102 до 15 октября т.г.
 
📣 Эдэр ыаллары дьиэнэн хааччыйыы подпрограмма кыттыылаахтара!

Федеральнай программаҕа сайаапка барарынан Учетнай даннайдаргытыгар (о.э. аат араспаанньа, дьиэ кэргэн чилиэнин ахсаана, олорор аадырыс) уо.д.а. уларыйыылар тахсыбыт буоллахтарына, улуус дьаһалтатыгар: Бороҕон сэл., Ленин аат. уул. 31, 102 кабинекка алтынньы ый 15 күнүгэр диэри докуомннаргытын тиксэрэргитигэр.